Къарæ ист æй социалон хизæгтæй.

Бæсти Социалон фонди цæгатиристойнаг хайадæ нæ региони цæрæг мин адæймагемæн гъæууон хæдзаради кусти туххæй федуй пенсимæ уæлæфтауæн æхца.

Тæккæ минкъийдæр дæс æма инсæй анзей дæргъи аграрон къабази ка бафæллойнæ кодта æма пенси исæвæруни рæстæг гъæути ка цардæй, уæхæн нæкосæг пенсиесгутæн гъæууон хæдзаради дæргъвæтийнæ кусти туххæй пенсимæ уæлæфтауæн æхца исæвæрунцæ.

Карæ кенæ сахъатдзийнадæмæ гæсгæ, фæдзæхстадон пенсимæ федаргонд феддонæй 25 проценти ке бæрцæ ‘й, еци аллимæйон уæлæфтауæни бæрцæ алли анз фулдæр кæнунцæ. Аци анз 9584 соми ке федаргонд бæрцæ ‘й, еци фæдзæхстадон пенси ка есуй, уæхæн адæмæн пенсимæ уæлæфтауæн æхцай бæрцæ ‘й 2396 соми. Пенсиесæг гъæуæй сахармæ ку раййева, уæддæр ин æвæрд бафтауйнаг æхца багъæуай кæнунцæ.

– Пенсимæ уæлæфтауæн æхца исæвæрунцæ проактивон уагæй, фæдзæхстадон пенсийæн документтæ аразуни рæстæг (уой хæццæ, пенсиесæг ку нæ коса, уæд ин уæлæфтауæн æхца федунцæ айдагъ уæхæн рæстæг).

Пенсиесæг нæуæгæй косун ку райдайа, уæд агъази амунд мадзæлттæн рæстæгмæ кæрон исæвæрунцæ. Пенсиесæг кустæй ку рандæ уй, уæд пенсимæ бафтауйнаг æхцатæ нæуæгæй хуæдбарæй, кустдæттæгæй ист бæрæггæнæнти бундорбæл, курдиадæ нæ барветгæй, исæвæрунцæ, – зæгъуй Уæрæсей Федераций Социалон фонди цæгатиристойнаг хайади разамонæг Милдзихти  Аслан.

Уæрæсей территорибæл гъæууонхæдзарадон кустуæтти ке æнхæст кодтонцæ, пенсийæн уæлæфтауæн æхцатæ исæвæруни рæстæг банимайунцæ, фонсдарунади, кæсалгæдарунадæ æма зайæгойти къабæзти æнхæстгонд уæхæн куст. Æнхæст номхигъдмæ хаунцæ 500 дæснийадемæй фулдæр (зæгъæн, агрономтæ, фонси дохтиртæ, механизатортæ, трактористтæ). Адæймаг  циуавæр бунат ахæста, уой нæ нимайгæй 1992 анзи 1 январи уæнгæ колхозти, совхозти, зæнхкосæг (фермерон) хæдзарæдти кенæ гъæууонхæдзарадон артелти кусти æмгъудтæ гъæууон стажи бахинцунцæ.

Дæс æма инсæй анзон стажмæ бахæссунцæ айдагъ гъæууон хæдзаради кусти æмгъудтæ нæ, фал ма сувæллæнттæмæ зелуни рæстæг, уæдта æнцойнæуагъд æма фæссæйгæ уни æмгъудтæ дæр. Уомæй уæлдай, гъæууон хæдзаради кусти хуæдфæсте сæрмагонд æфсæддон операций архайди æмгъудтæ дæр кæд цудæнцæ, уæд пенсимæ уæлæфтауæн æхцатæ бафтауни фæдбæл барæ бæлвурд кæнуни рæстæг аци æмгъудтæ банимайдзæнæнцæ (уой хæццæ, аци æмгъудтæ дувæр бæрцæй бахинцдзæнæнцæ).

Фарстатæ уæмæ кæд байзадæнцæ, уæд уæмæ ес 8-800-100-00-01 телефонæй  Уæрæсей Социалон фонди еумæйаг контакт центрмæ лæвар бадзоруни барæ (Уæрæсей Федераций Социалон фонди цæгатиристойнаг хайади линий кусти фæткæ: авдисæрæй цуппæрæни уæнгæ – 9.00 сахаттемæй 18.00 сахаттей уæнгæ, майрæнбони ба – 9.00 сахаттемæй 16.00 сахатти æма 45 минуттей уæнгæ).