Нур цалдæр анзей дæргъи Цæгат Иристонмæ иссæуй Устур Фидибæстон тугъди цæугæ музей «Уæлахези поезд». Уотæ аци анз дæр бабæй æрæги нæ республики цæргутæ æма иуазгутæ «Уæлахези поезд»-бæл хъæбæр цитгинæй исæмбалдæнцæ. Беслæни æфсæнвæндаги станций 15 æма 16 мартъий ами еци цæугæ музей фæцæй, 17 мартъийи ба рараст æй Мæздæгмæ.

Уой фæдбæл Беслæни арæзт мадзали архайгутæ зæрдиагæй арфитæ  ракодтонцæ, аци ахсгиаг гъуддаг ка исаразта, уонæн. Сæ загъдмæ гæсгæ, тугъдон хабæрттæ æма цаутæ зæрдæбæл дарун, цитгин сæ кæнун, ирæзгæ фæлтæрти патриотон гъомбæлади кустмæ нæ республики алли райони æма гъæути дæр гъæуама лæмбунæг цæстдард уа.

«Уæлахези поезд» æй дуйней фиццаг уæхæн цæугæ музей. Арæзт æрцудæй  Устур Фидибæстон тугъди историй бундорбæл. Экспозицити æвдист цæунцæ тугъдон æнзти хецæн хабæрттæ æма цаутæ.

Уæлахези историон поезд арæзт æй дууадæс вагонемæй, дæс æма дууинсæй видеопроекти си, уотемæй.

Еци минкъий видеоравдистити цæмæдесæй фæууинæн ес советон тугъдонти æскъуæлхтдзийнæдтæбæл дзорæг æвдесæнтæ.

«Уæлахези поезд» ка бабæрæг кодта, еци дзиллæй – уонæн ба сæ фулдæр æригæнттæ адтæнцæ – бæлвурддæрæй баруагæс уй, тугъди рæстæг немуцаг-фашистон æрбалæборгути нихмæ æма æнæгъæнæ дуйне, уæлдайдæр ба европæйаг паддзахæдти цæрæг адæмти гермайнаг нацизми æверхъаудзийнадæй фæййервæзун кæнуни сæрбæлтау тохи советон адæми хъиамæт цæйбæрцæбæл агъазиау адтæй,  цæйбæрцæбæл æгæрон зинтæ
æма фудæбæнттæ æвзурстонцæ нæлгоймагæй æма силгоймагæй, хестæрæй æма кæстæрæй. «Уæлахези поезд» ма исхонæн ес наукон дæр, уомæн æма аци гъуддаг æнæ наукон цæстингасæй æма æртасæн кустæй исаразæн æнцон нæ адтайдæ.