19 майя 2022

«УÆЛАХЕЗИ ПОЕЗД» ИССÆУДЗÆНÆЙ ДЗÆУÆГИГЪÆУМÆ

27.10.2020 | 10:10

Нæ Цитгин Уæлахези 75 анзей кадæн нæ Фидибæсти ци берæ аллихузон цитгингæнæн мадзæлттæ арæзт цæуй, уонæй еу æй патриотон акци «Уæлахези поезд» – е арæзт цæуй нæ Фидибæсти берæ рауæнти.

Зундгонд куд æй, уотемæй «Уæлахези поезд» Цæгат Иристонмæ иссæудзæнæй 11 ноябри. Æма дууæ боней дæргъи Цæгат Иристони цæргутæ æма республики иуазгутæн уодзæнæй аци цæугæ музейи цæмæдессаг æрмæгути хæццæ базонгæ уни фадуат.

Акций маршрут, ку зæгъæн, райтинг æй æнæнгъæнæ Уæрæсей номдзуддæр рауæнтæбæл – бæлвурддæрæй ба Сахартæ-бæгъатæртæ æма æфсæддон намуси Сахартæбæл.

Дзæуæгигъæуи фæсте ба цæугæ музей рабалци кæндзæнæй сибираг регионтæмæ, сауæнгæ Владивостоки уæнгæ дæр. Æ еугур еци нæдтæбæл цæугæй «Уæлахези поезд»-æн æ æрлæууæнтæ уодзæнæнцæ, куд устур сахарти, уотæ минкъий цæрæн рауæнти дæр.

Цæмæй аци еугуруæрæсеуон акций цæгатиристойнаг хай тæккæ гъæугæдæр хузи лæмбунæг цæттæгонд æрцæуа, уой туххæй сæрмагонд организацион къуар иснисан кодта бæлвурд мадзæлттæ. Нуриккон санитарон-эпидемиологон уавæртæмæ гæсгæ сæрмагонд æргом æздæхт цæудзæнæй акций еугур архайгути санитарон æдасдзийнадæмæ.