28 майя 2022

УОДЗÆНÆЙ НÆМÆ НÆХЕ ХУÆРЗАДÆ ÆХСИРИ ПРОДУКЦИ!..

31.03.2021 | 21:26

Хестæртæй ахид фегъосæн: «Уогæ ба раги цæйбæрцæбæл хуæрзадæ уидæ хъаймагъ, кенæ царв æма месин – ку си бахуардтайсæ, уæд цидæр зæрдæхцæуæндзийнадæ райстайсæ… Нур ба?.. Сæ уотид исахуадунмæ дæр адæймаг игетгæ кæнуй… Гъе уоййасæбæл æнадæ фæуунцæ, фал сæ уæддæр æлхæнæн, æндæр гæнæн нæййес…»

Сæ еци загъдæй æхсири абониккон продукци æлхæнгутæ раст æнцæ. Æма цæмæй адæмæн бабæй равгæ уа, æцæгæй хуæрзадæ продукцийæй пайда кæнунæн, уой туххæй еци гъуддаг исаразуни ихæс æхемæ райста игъустгонд компани «Деликат»-и разамунд.


Компани «Деликат»-æн бундор æвæрд æрцудæй 2004 анзи. Уæдæй абони уæнгæ æ фадуæттæ исирæзтæнцæ, агъазиау кустуат иссæй. Ци проекттæ æнхæстгонд цæуй, етæ ‘нцæ: фонсæвгæрдæн, фидизгъæли кустгæнæн æма адгийнæгтæ цæттæгæнæн цехтæ, кафе æма хуайраги продуктти устур тукæнттæ.

Компани «Деликат»-и архайди сæйрагдæр нисан æй нæ республики фæлхасгæнгутæн хуæрзадæ продукттæ уадзун, æма кустуати коллективи къохи еци гъуддаг æфтуйуй.

Æрæги аци берæкъабазгин компани никкидæр ма фæуурухдæр æй: бафтудæй ма ибæл æхсирикустгæнæн æма æхсири продукци уадзæн нæуæг цех. Е æхцæуæн цау æй, ке зæгъун æй гъæуй, республикæмæ æндæр рауæнтæй ласт æхсири продуктти хуæрзгъæдæдзийнадæбæл иристойнаг фæлхасгæнæг уойбæрцæ нæбал æууæндуй. Нæхе хуайраг ба кæддæриддæр хуæрзгъæдæдæр адтæй. Кустуатмæ æрбацудæй нæ республики Хецауади Сæрдар Тускъати Таймораз дæр æма кæрæй-кæронмæ æрзилдæй кустуатбæл.

«Деликат»-и генералон директор Битарти Алик журналисттæн æма иуазгутæн бæлвурд радзурдта, кустуати равзурди æма архайди туххæй хабæрттæ.

– Зин адтæй фиццаг, фал къæпхæнгай ирæзтæй компани, фиццагидæр си косун ка райдæдта, еци косгутæ æхсæвæй-бонæй сæ хъауритæбæл нæ ауæрдгæй архайдтонцæ, цæмæй кустуат федар æ къæхтæбæл æрлæууа. Нæ нисан уæхæн некæд адтæй æма базарадæ еугурæйдæр нæхе бакæнæн, фал фиццагидæр бæллæн, цæмæй еци базарадæмæ хуæрзгъæдæ продукци хъæртун кæнæн.

Цæгат Кавкази федералон зилди ирæзти программи бундорбæл ма  исæнхæст кодтан еу проект – къалбаси продукци уадзуни фæдбæл. Аци рауæн нæмæ инвестицион агъази фæрци фулдæр æрбацудæй æма еци бæрæггæнæн агъаз æй нæ республики социалон-экономикон ирæзтæн дæр. Нур ба нæуæг фæндæбæл бакустан. Рагæй адтæй нæ зæрди æхсири завод дæр байгон кæнун æма си нури уæнгæ косуй 30 адæймаги. Еу суткæмæ 10 тонни æхсирбæл куст кæми цæудзæнæй, уæхæн лини нæмæ арæзт æрцудæй нуриккон техники бундорбæл. Ес нæмæ лаборатори дæр, æхсири продуктти хуæрзгъæдæдзийнадæ ка бæрæг кæндзæнæй, уæхæн хайади хæццæ, – загъта Битарти Алик.

Тускъати Тайморазæн бæлвурд равдистонцæ лини куд косуй æма æхсир кустгонд куд цæуй, уони. Хецауади Сæрдар æ гъудитæ загъта нæуæг цехи туххæй.

– Æхцæуæн мин æй, нæ республики хуайраги промышленности ирæзт бæрзонддæр ке кæнуй, е. Экологон æгъдауæй кæдзос æма хуæрзгъæдæ хуайраг адæмæн кæнун – е æй нæ сæйрагдæр ихæс. Абони базарадон экономики уавæрти æнтæстгин æнцæ, нæуæг инновацион технологитæй æ кусти ка пайда кæнуй, нуриккон рæстæги домæнтæн дзуапп ка дæттуй, уæхæн кустуæттæ. Нæ ихæс махæн æй уæхæн гъуддаги фарс бадарун æма агъаз кæнун. Фæстаг æнзти нæ республики гъæууон хæдзарадæ æнтæстгинæй архайуй. Анзæй-анзмæ ирæзунцæ æ продукций бæрæггæнæнтæ. Фал нæ гъæуй еци продукций куст кæнуни къабази ирæзтбæл дæр бæлвурддæр косун, – загъта Тускъати Таймораз.

Кустуати æхсирикустгæнæн цехмæ хомаг ласунцæ бунæттон æма Краснодари кæдзос районти фермитæ. «Деликат»-и æхсири продукттæ, æхсирисæртæ, цæхгун цихт, месин балхæнæн ес компаний сæрмагонд тукæнтти.

Кустуат архайуй паддзахадон программи дæр. Уонæй еу – «Цæгат Кавкази федералон зилди» ирæзт. Фал еугуремæй сæйрагдæр æй косгутæн гъæугæ уавæртæ исаразун, цæмæй син сæ куст тухстдзийнæдтæ ма ‘взарун кæна, фал зæрдрохсæй косонцæ.

Цех байгон кæнуни мадзали сæйраг лентæ ралух кæнуни барæ лæвæрд æрцудæй нæ республики Хецауади Сæрдар Тускъати Тайморазæн. Кустуатбæл æрзелун æма хе цæстæй фæууинун нæуæг нуриккон ефтонггæрзтæ иуазгутæй алкæмæндæр цæмæдессаг адтæй.