28 майя 2022

ВАКЦИНАТИ ÆЙ НÆ ЕУГУРЕМÆН ДÆР ИСÆНХÆСТ КÆНУЙНАГ ГЪУДДАГ

04.06.2021 | 21:51

Аци бæнтти Цæгат Иристонмæ исæрвистонцæ нези нихмæ æртиккаг уæрæсейаг вакцинæ «КовиВак»-и фиццаг парти (ес си 780 дози). Нæуæг вакцинæ рауагъта М.Чумакови номбæл федералон наукон-æртасæн центр, æнæмæнгæ гъæугæ  фæлварæнтæ ин исаразтонцæ. Уони хатдзæгтæ хинцгæй, Уæрæсей Федераций æнæнездзийнадæ гъæуайкæнуйнади министрадæ «КовиВак» сæрмагонд æгъдауæй регистраци искодта 2021 анзи 20 феврали. Нур вакцинæ æрветун райдæдтонцæ уæрæсейаг регионтæмæ.

Нæуæг хуасæй вакцинаци дæр æнхæстгонд цæуй дууæ къæпхæнемæй: фиццаг æма дуккаг уколти ‘хсæн гъæуама рацæуа дууæ къуæрей. Специалисттæ куд зæгъунцæ, уотемæй нæуæг хуасæй испайда кæнæн ес, æртинсæй анземæй фулдæр кæбæл цæуй, еци адæмæн дæр, уæдта ма дзиллон вакцинаций архайуни барæ ес, æстдæс анзи кæбæл исæнхæст æй, еци адæймæгутæн дæр.

Вакцинаций фæткæ идарддæр дæр  æй уæхæн: укол искæнунвæндæ ка искодта, еци адæми бацæун гъæуй фæзуатон поликлиникитæмæ, кенæ ба вакцинацимæ хе ниффинсун паддзахадон лæггæдти портали фæрци.

Укол искæнуни размæ адæймагмæ гъæуама æркæса терапевт.

***

Раздæр ма куд игъосун кодтан, уотемæй Дзæуæгигъæуи медицинон колледжи æ куст кæнуй вакцинацигæнæн пункт.

Колледжи директор Реуазти Таймураз куд радзурдта, уотемæй, вакцинæ ка искодта, уæлдайдæр ба æ дууæ компоненти, уони нимæдзæ уоййасæбæл берæ нæма ‘й. Æ загъдмæ гæсгæ, æстдæс анзи кæбæл исæнхæст æй, уæхæн æригæнтти нимæдзæ нæ республики æй еуæндæс æма инсæй мин адæймаги, æма сæ еугур дæр гъæуама вакцинаци искæнонцæ,  фал еци гъуддагмæ нæ республики уæлдæр ахургæнæндæнтти фагæ æргом æздæхт цæмæдæр гæсгæ  нæ цæуй.

Куд радзурдта, уотемæй медицинон колледжи ахургæнгутæ æма косгутæ сæ еугурдæр искодтонцæ вакцинаци, сæ хестæр Цæргæсти Милусябæл цæуй еу æма цуппаринсæй анзи, æма е дæр вакцинæ искæнуни фæсте æхе æнкъаруй хуарз. Сæ ахурдзаутæй ба вакцинаци æдеугурæй искодтонцæ 115 адæймаги, уонæй вакцини дуккаг компонент – 106 студенти.

Ахургæнæндонæн æнгом бастдзийнадæ ес Дзæуæгигъæуи 1-аг поликлиники хæццæ. Алли хатт дæр вакцинацигæнæн бон вакцинæ «Спутник V» æмбæлгæ уавæрти медицинон колледжмæ æрбаласунцæ уордигæй. Зæгъун гъæуй уой дæр, æма колледжмæ вакцинæ искæнунмæ æрбацæуни барæ ес æ алфамбулай цæрæг адæмæн дæр.

Вакцинацигæнæн пункт косуй къуæрей медæгæ дууæ бони – æртиккæг æма майрæнбони, 9.00-16.00 сахаттемæ.