04 марта 2024

ВЕТЕРАНТÆН АГЪАЗИ ФОНД

03.06.2023 | 21:48

Уæрæсей Президент Владимир Путини унаффæй арæзт æрцудæй сæрмагонд æфсæддон операций ветерантæн агъази паддзахадон фонд. Æ дæлхайæдтæ ба байгон æнцæ Уæрæсей регионти дæр. Уæхæн регионалон хайадæ æрæги байгон æй Дзæуæгигъæуи дæр. Уой фæдбæл фонди бæстихаййи рази ци цитгин мадзал арæзт  æрцудæй, уоми архайунмæ æрæмбурд æй берæ дзиллæ. Уонæн зæрдиагæй райарфæ кодта нæ республики Сæргълæууæг Сергей Меняйло. Æма æ радзубандий ба загъта:

– Сæрмагонд æфсæддон операцийæн æ райдайæни тæккæ фиццаг бæнттæй фæстæмæ Цæгат Иристон  алливæрсуг агъаз кæнуй æфсадæн, уоми архайгутæн æма сæ хеуæнттæн. Нæ фæсевæдæй еци операций ка архайуй, етæ ’нцæ раззагдæрти æмрæнгъæ, гъулæггагæн, уотæ дæр рауадæй, æма си  беретæ сe ’фсæддон ихæстæ æнхæст кæнгæй сæ цард иснивонд кодтонцæ Фидибæсти сæрбæлтау. Бæргæ лæдæрд æй е дæр, æма тугъд тугъд æй… Уæддæр зин æй, уæхæн фæсевæд не ’хсæнæй ке фæгъгъудæнцæ, ристзæрдæй хъонц кæнгæй син сæ рохс нæмттæ нæ дзиллæ имисунцæ, æма, федарæй ми æруагæс кæнуй, фæлтæрæй-фæлтæрмæ сæ имисдзæнæнцæ куд нæ адæмон бæгъатæртæ, уотæ. Аллибон мæ цæстæ дарун, сæ бийнонтæн, сæ кæстæртæн цæмæй фæййагъаз кæнун гъæуй, уомæ.

Сергей Меняйло ма æ радзубандий куд баханхæ кодта, уотемæй нæуæг арæзт фондæн æ архайди сæйраг нисан æй, еугур министрадтæ æма ведомствити хæццæ æмгуст кæнун, цæмæй агъазгор ка ’рбацæуа, уонæмæ уа гъæугæ лæмбунæг цæстдард:

– Гъæуама лæдæронцæ нæ ауодундзийнадæ сæ кадгин хъиамæтти фæдбæл. Цæмæй æхсæнадæ сæрустур уа нæ ветерантæй, уобæл еумæйагæй архайун гъæуй. Аци лæггадæ Фидибæстæ гъæуайгæнгутæн закъонмæ гæсгæ æмбæлуй æма ’й кæнун гъæуй аккаг хузи. Нæуæг филиал ба нин уомæн уодзæнæй агъаз. Абони ма тохи будури ка ’й, уонæн ба мæ зæрдæ зæгъуй, уæлахез куд уонцæ, дзæбæхæй сæ бийнонтæмæ куд иссæуонцæ тагъд рæстæги.

Мамсурати Геуæрги (æ фæсномуг «Ксанти») зундгонд æй куд æфсæддон уацхæссæг. Æдасæй, нифсгунæй æ куст æнхæст кæнуй Донбасси. Нæ лæхъуæнтæ куд бæгъатæрæй тох кæнунцæ, уой туххæй æцæгдзийнадæ æвдесуй æма дзоруй.

– Абони фонди филиал Цæгат Иристони дæр ке байгон æй, е устур гъуддаг æй, – баханхæ кодта Мамсури-фурт æ радзубандий. – Тугъдон уавæрти æфсæддонтæн фæккеуй се ’нæнездзийнадæ, агъаз сæ багъæуй. Юридикон зонундзийнæдтæ алкæмæ нæййес æма аци фонд алливæрсуг лæггадæ кæндзæнæй, агъазагор сæмæ ка ’рбацæуа, еци адæмæн. Мах, æфсæддон уацхæсгутæ, архайдзинан идарддæр дæр бастдзийнадæ дарун, æцæгдзийнадæ уæмæ хъæртун кæндзинан.

Фонди бæстихай медæгæй зæрдæмæдзæугæ фæлустгонд æй – аййев æма райдзаст, ка си косдзæнæй, етæ сæрмагонд ахуртæ рацудæнцæ. Ес си хецæн косæнуæттæ психологон æма социалон агъазæн, къуар адæймаги сæ рæстæг кæми æрветонцæ, демонстрацион ке хонунцæ,  еци кабинети ба багъæуаги рæстæг ахур кæндзæнæнцæ, реабилитаций фæрæзнити хæццæ раст куд архайгæй, уобæл.

Алли адæймагмæ дæр си каст цæудзæнæй хецæн цæстингасæй, еци-еу рауæн ин дзуапп ратдзæнæнцæ æ еугур фарстатæн.

ХЕКЪИЛАТИ Маринæ