Республики Сӕргълӕууӕги ихӕстӕ рӕстӕгмӕ ӕнхӕстгӕнӕг Сергей Меняйло ӕрӕги фембалдӕй зундгонд историк ӕма археолог Владимир Кузнецови хӕццӕ. Фембӕлди размӕ ба игъустгонд ахургонд, Цӕгат Кавкази, уӕдта алайнаг истори ӕртасӕг базонгӕ ‘й Цӕгат Иристони Национ музейи экспозиций хӕццӕ.

Сӕ фембӕлди рӕстӕг Сергей Меняйло куд радзурдта, уотемӕй ӕ наукон-ӕртасӕн архайдӕй Иристонӕн е цӕйбӕрцӕ пайда ӕрхаста ӕма ци берӕ хуӕрзти бацудӕй, уомӕн аргъ искӕнун зин ӕй.

– Цӕгат Иристон ӕй, уӕрӕсейаг арӕнтӕбӕл ка ӕрбунат кодта, уӕдта, стратегион ӕма геополитикон ӕгъдауӕй хъӕбӕр ахсгиаг ка ‘й, уӕхӕн республикӕ. Цӕгат Иристон размӕ цӕмӕй цӕуа ӕма гъомусгиндӕр кӕна, уомӕн си ес берӕ гӕнӕнтӕ. Ӕма еци гӕнӕнтӕй куд хуӕздӕр ӕй, уотӕ испайда кӕнун махӕн ӕй нӕ ихӕс, цӕмӕй Уӕрӕсей регионти ‘хсӕн республикӕ байахӕсса раззагдӕр ӕма аккагдӕр бунӕттӕй еу. Иристони хуӕрзӕбонӕн, ирон адӕми ӕгъдӕуттӕ ӕма культурӕ багъӕуай кӕнуни гъуддаги дӕуӕн дӕ байвӕрӕн ӕй ӕгӕрон берӕ, ӕма ми нифс ес, алайнаг ирон адӕми истори ӕртасуни кусти ма дӕ къохи ӕнтӕститӕ никкидӕр ке бафтуйдзӕнӕй, – загъта Сергей Меняйло.

94-анздзуд историк ӕ царди 42 анзи иснивонд кодта Цӕгат Кавкази истори, комкоммӕ алайнаг истори, дуйнейӕн базонун кӕнунӕн. Ӕма нур ӕ кари кӕд ӕй, уӕддӕр ма ‘й фӕндуй ирон адӕмӕн никки фулдӕр хуӕрзти бацӕун.

Владимир Кузнецов республики Сӕргълӕууӕги ихӕстӕ рӕстӕгмӕ ӕнхӕстгӕнӕгӕн балӕвар кодта, ӕрӕги ин ци киунугӕ рацудӕй, уой, уӕдта, Аланистони исаргъудбӕл 1100 анзи ке ӕнхӕст кӕнуй, уой фӕдбӕл ци историон бунтӕ ӕма документтӕ бамбурд кодта, уони.

Уой фӕсте Владимир Кузнецов фембалдӕй нӕ республики ӕхсӕнади, наукӕ ӕма интеллигенций минӕвӕртти хӕццӕ, историуарзгути хӕццӕ ӕма сӕ базонгӕ кодта, «Ка ан», зӕгъгӕ, ӕ нӕуӕг киунуги хӕццӕ, уӕдта дзуӕппитӕ равардта, алайнаг истори ӕма археологи Цӕгат Кавкази историй хӕццӕ баст адӕми ци берӕ фарстатӕ цӕмӕдес кӕнунцӕ, уонӕн.

Цӕгатиристойнаг ӕхсӕнади хӕццӕ зундгонд историкки фембӕлд амудта национ гъуддӕгути фӕдбӕл министри ихӕстӕ рӕстӕгмӕ ӕнхӕстгӕнӕг Цуцити Аслан. Дзӕуӕгигъӕуи Минӕвӕртти ӕмбурди сӕргълӕууӕг Икъати Русланбег ба ахургонд ӕма тугъди архайӕгӕн равардта реубӕлдаргӕ майдан «Дзӕуӕгигъӕу – тугъдон намуси Сахар».