Республикӕ Цӕгат Иристон-Аланий Сӕргълӕууӕги ихӕстӕ рӕстӕгмӕ ӕнхӕстгӕнӕг Сергей Меняйлойӕн косӕг балци адтӕй паддзахадон бӕхти-драмон театр «Нарт»-мӕ. Хецауади Сӕрдари хуӕдӕййевӕги ихӕстӕ рӕстӕгмӕ ӕнхӕстгӕнӕг Туйгъанти Ларисӕ ӕма культури министри ихӕстӕ рӕстӕгмӕ ӕнхӕстгӕнӕг Къубалти Эльбруси хӕццӕ ӕрзилдӕнцӕ театри фӕзуатбӕл, ӕ разамунди хӕццӕ радзубанди кодтонцӕ.

Театрӕн бундор исӕвардтонцӕ 1990 анзи, уомӕй байеу кодтонцӕ драмон, хореографион, спортивон, цирки аййевадӕ. Абони Уӕрӕсей е ӕй еунӕг бӕхти-драмон театр, косуй си 20 артисти, труппи ес 11 бӕхи. Ӕ разамонӕг Сихъоти Тимур куд зӕгъуй, уотемӕй фарӕ театрӕн балхӕдтонцӕ ӕма исфедар кодтонцӕ гъар ангар – бӕхти манеж. Уой фӕрци артисттӕ анзи дӕргъи репетици кодтонцӕ ӕнӕкъулумпитӕй. Театрмӕ ма игон арви буни манеж дӕр ес. Фал республики Сӕргълӕууӕги агъаз кӕми гъӕуй, уӕхӕн фарстатӕ дӕр лӕуунцӕ сӕ размӕ. Нӕ син фагӕ кӕнуй административон бӕстихай, сӕ фӕзуат унгӕггомау ӕй.

Еци бон Сергей Меняйло базонгӕ ‘й Адӕмон кафти паддзахадон академион ансамбль «Алан»-и коллективи кусти уавӕрти хӕццӕ. Ӕ аййевадон разамонӕг Козати Зелимхани хӕццӕ дзубандий фӕсте республики Сӕргълӕууӕг байхӕс кодта, цӕмӕй цубур ӕмгъудмӕ бацӕттӕ кӕнонцӕ бакӕнуйнаг гъуддӕгути ӕма нисанти хигъд. Сергей Меняйло исӕвардта кафгути размӕ ихӕс: гъӕуама уӕлдӕр, хуӕздӕр ӕмвӕзадӕмӕ рахезонцӕ.

Ансамбль «Алан» фӕззиндтӕй 1938 анзи, коллектив ӕрзилдӕй дуйней берӕ бӕстӕбӕл, фондз континенти дуйнеуон фестивали сугъзӕрийнӕ майдани хецау иссӕй французаг Дижони, ӕй Хетӕгкати Къостай премий лауреат, еугуруӕрӕсеуон ӕма дуйнеуон конкурсти уӕлахездзау. Нуртӕккӕ исфӕлдистадон къуари ес 80 адӕймаги, ӕ репертуари – 16 исфӕлдистадон номери. Программӕ гъавунцӕ фӕуурухдӕр кӕнун, хуӕцгӕнези азарӕй сӕ гастрольтӕ бауорӕдтонцӕ. Сӕ тухстагдӕр фарстатӕ ‘нцӕ минкъий улупа, гъӕугӕ автобус балхӕнун ӕма репетицитӕ кӕнӕн бунати цалцӕг.