Зæлланг гъæлæсæй æз царди
Никкæндзæнæн тохи зар.
Исæхседдзæнæн нæ арти,
Нæбал гурдзæнæй мæ гал.

 Ниццæйфæнздзæнæй мæ зари
Бæрзонддæр хъурæй къæдзæх
Ка ма баддзæнæй хæдзари,
Гъаздзæнæй рæуæг мæ бæх.

Ку æрлæууа æндæр дзаман,
Ку багъæуа фулдæр тох,
Искæндзæнæн хуæздæр амал;
Нæ зæгъдзæнæн уæддæр «ох».

Низзардзæнæн зæллангдæрæй
Дзилли номæй мæ хæтæл.
И зартæ ма тохи гъæрæй
Нæ уодзæнæн æз мæтъæл.

Зæлланг гъæлæсæй мæ царди
Никкæндзæнæн тохи зар.
Нæ мин райсдзæнæй мæ барти
Некæдæр бони и хъал.

 Уотæ финста Бесати Тазе æ исфæлдистадон цардвæндаги райдайæни æ фиццаг æмдзæвгитæй еуеми. Æма æ еци нифсхасти зæрдиуагæ – «Никкæндзæнæн тохи зар» –нæ раййивта, е нæ, фал æй тухгинæй-тухгиндæргæнгæй фæлгонц кодта æ берæвæрсуг литературон æма публицистикон исфæлдистади. Æ агъазиау фæллæнттæ æнæгъæнæйдæр адтæнцæ адæмæн хуарздзийнадæ фæууни сæрбæлтау æма син аргъгæнæг дæр етæ ‘нцæ. Æма нури рæстæгути дзиллæ киунугутæ кæсунмæ уоййасæбæл тулаваст кæд нæбал æнцæ, уæддæр ин зæрдæхцæуæнæй кæсунцæ æ уадзимистæ.

Мах ба ин æ рохс ном уомæ гæсгæ имисæн, æма нæ номдзуд финсæг æма публицист Бесати Урусбий фурт Тазей райгурдбæл 27 июни исæнхæст æй финддæс æма фондзинсæй анзи (1910-1981). Уомæ гæсгæ абони нæ газети мухур æрмæг æ цардвæндаги туххæй, уæдта æ финст уадзимистæй кæцидæрти дæр.