Нæ рагфидтæлтæ уотæ зæгъиуонцæ: «Зæнхæй рацудæй: ранихæ мæ æма дæ ранихон!..» – гъома, базелæ мæмæ æма дæ цæрунгъонæн ци гъæуй, уомæй фæххайгин кæндзæнæн… Æцæгæйдæр уотæ ке ’й, уой уæлдай бæлвурддæрæй зонуй зæнхкосæг. Уæлдайдæр ба Цæгат Иристони – аграрон къабази зингæ бунат ахæссуй нæ республики еумæйаг экономикон архайди. Æ дзубандимæ гæсгæ, Цæгат Иристони гъæууонхæдзарадон кустади индекс, рæстæмбес еугуруæрæсеуон бæрæггæнæнти хæццæ рабаргæй, æй бæрзонддæр. Евгъуд анз æма фæстаг æхсæз мæйей кустæн хатдзæгтæ æвдесунцæ, фонсдаруйнади æма æхсири æрдугъди бæрæггæнæнтæ ке ирæзунцæ, уой.

Цæгат Иристони анзæй-анзмæ фулдæр кæнуй зæнхкосæг-фермерон хæдзарæдти нимæдзæ, агропромышленнон комплекси къабази ирæзуй минкъий æма рæстæмбес амалгъонади субъектти нимæдзæ. Еугур гæнæнтæ æма равгитæй архайд цæуй гъæууонхæдзарадон кустади идарддæри райрæзтбæл, мадзæлттæ арæзт цæуй къабази косæндæнтти модернизацийæн, хæдзарæдтæ техникон æгъдауæй гъомусгиндæр кæнунцæ. Уой хæццæ сæрмагонд æргом æздæхт цæуй гъæууон цæрæнбунæтти фæлгонцадæмæ дæр.

Еугур еци фарстати абони уавæр æма сæ идарддæри райрæзти фæдбæл фарстатæбæл цудæй бундорон дзубанди, нæ республики разамонæг Сергей Меняйлойæн æрæги ци фембæлд адтæй Уæрæсей Хецауади Сæрдари хуæдæййевæг Дмитрий Патрушеви хæццæ, уоми.

Фембæлди рæстæг ма дзубанди цудæй, фиццагкезуй национ проект «Экологи»-й фæлгæти фæстаг æнзти дæргъи республики ци мадзæлттæ арæзт æрцудæй, уонæбæл. Куд амунд æрцудæй, уотемæй ахедгæ куст цудæй æнæзакъон бугъгалæнтæ рандæ кæнунбæл, цæугæдæнтти санитарон кæдзосдзийнадæбæл, гъæди фæзуæттæ фæффулдæр кæнунбæл, экологон фæрнугади хæццæ баст æндæр вазуггин фарстатæбæл. Еугур еци куститæн æхсæз анземæ федералон бюджетæй регионæн дехгонд æрцудæй цуппар миллиард сомей бæрцæ. Еугур еци фарстатæбæл куст фæййахедгæдæр уодзæнæй нæуæг национ проект «Экологон фæрнугадæ»-йи фæрци.

Дмитрий Патрушев æма Сергей Меняйло фæббæлвурд кодтонцæ, хæстæгдæр æнзти ци райрæзти проекттæ æма программитæбæл куст цæудзæнæй, уони номхигъд.