22 июнь… Аци бон Уæрæсей адæмтæн, уæдта дуйней берæ паддзахæдти рæстзæрдæ дзиллитæн дæр æностæмæ иссæй фудонхи æма имисæни бон… Фондз æма цуппаринсæй анзей размæ еци бон нæ Райгурæн бæстæмæ тогмондагæй æрбалæбурдтонцæ немуцаг-фашистон æрдонгтæ… Райдæдта Устур Фидибæстон тугъд… Уой гъезæмайраг 1418 боней дæргъи Советон Цæдеси еугур адæмти минæвæрттæ дæр æхсаргинæй тох кодтонцæ знаги нихмæ тугъди будурти, уодуæлдайæй хъазауат кодтонцæ фæскъилдуни кустуæтти, колхозон будурти, сæхебæл нæ ауæрдгæй архайдтонцæ, сæ соми «Алцидæр – фронтæн, алцидæр – Уæлахезæн!..» тæккæ æнхæстдæрæй æнхæст кæнунбæл. Æма советон адæмæн бантæстæй, æнæгъæнæ дуйнетæй ка не ’руагæс кодта, еци тæходуйаг уæлахез – гермайнаг фашизм æ сирддон лæгæти – Берлини – хорхгонд æрцудæй 1945 анзи уæлахезон майи мæйи.

Нæ уæлахез нин кæд æгæрон цитгийнаг æй, уæддæр æй цийнæ æма цæстисуги хæццæ бæрæгбон, зæгъгæ, хумæтæги нæ хонæн – æгæр, исаргъгæнæн дæр кæмæн нæййес, уоййасæбæл æверхъау сæрбæлхаст нин иссæй… Уомæ гæсгæ, кæд æма æ фæуунтæбæл цуппаринсæй анземæй фулдæр рацудæй, уæддæр нæ зæрдрист не ’нцайуй, нæ нидæндæр кæнуй… Уæдта, æвæдзи, уотæ уодзæнæй фæлтæрæй-фæлтæрмæ дæр… Æма нæ зæрдити еудадзуг асдзæгъддзæнæй нæ табуйаг ихæс: еци рæстæгути хабæрттæ имисун æма зæрдæбæл дарун гъæуама еугай бæнттæбæл ма евгъуйа…