01 декабря 2022

ЗУНДГИН ЗАГЪД ФАТ ӔЙ!..

24.09.2021 | 15:58

Еу лӕг фестӕгӕй надбӕл цудӕй, уотемӕй ӕй кадӕр ӕ уӕрдуни бадгӕй баййафта.

– Дӕ над раст уа, хуарз лӕг! – дзоруй имӕ фестӕг.

– Арфӕгонд уо ӕма дӕу над дӕр раст уӕд! – дзуапп ин равардта уӕрдунгин.

– Бӕргӕ, фал хъӕбӕр бафӕлладтӕн ӕма мӕ дӕ уӕрдуни ку рабадун кӕнисӕ.

Уӕрдуни хецау ӕй ӕ фарсмӕ исбадун кодта. Байеудагъ син ӕй дзубанди. Фестӕг бӕлццон базудта, ӕ хуӕрзгӕнӕг Ӕрӕдонӕй ке цӕуй, ӕ муггаг ба Габантӕй ке ‘й, уой.

Еуцӕйбӕрцӕдӕр ку рауадӕнцӕ, уӕд фестӕг бӕлццон сабургай байдӕдта зарун:

Уӕй ӕма Бехъани курӕнттӕ

Цъататӕ лӕхорунцӕ, гъей!

Ци кӕнон, куд кӕнон

Ме ‘мгӕрттӕ, гъей!

Габанти хъалтӕ мӕмӕ

Хъӕматӕй лӕборунцӕ, гъей!..

Уӕрдунгин ӕй уайтӕккӕ фӕууорӕдта:

– Нуртӕккӕ фӕддунд уо мӕ уӕрдунӕй!

– Цӕмӕн?.. Ци ‘рцудӕй?.. Дӕхуӕдӕг мӕ ку исбадун кодтай дӕ уӕрдуни!..

– Ӕма дин ӕз уотӕ загътон, уӕхӕн зар кӕнай?!

– Йарӕбий, уотӕ ку фӕззӕгъунцӕ, ке уӕрдуни исбадай, уой зар кӕнӕ…


Аци таурӕхъи ци фестӕг бӕлццони кой цӕуй, е уӕддӕр зудта ке уӕрдуни рабадтӕй ӕма кумӕ бахъӕртуйнаг ӕй, уой. Фал мах ба, Уӕрӕсей хумӕтӕг адӕм, нерӕнгӕ дӕр ӕй нӕма балӕдӕрдтан, Советон Цӕдеси фехӕлди фӕсте нин ке уӕрдуни бадгӕ рауадӕй ӕма нӕ кумӕ бахъӕртун кӕндзӕнӕй. Еунӕг е лӕдӕрд ӕй, ӕма, мах ка гъӕуй, еци уӕрдун ке нӕй, уӕдта, кумӕ нӕ фӕндуй, уордӕмӕ дӕр, ӕвӕдзи, нӕ бахъӕртун кӕндзӕнӕнцӕ уӕрдуни хецӕуттӕ – уонӕмӕ айдагъдӕр сӕхе хуарзи сагъӕс ес.

Альбер Камю (1913-2013), французаг финсӕг ӕма философ: «Дӕс ӕма инсӕй анзи мӕбӕл ку исӕнхӕст ӕй, уӕд мӕмӕ еу райдзаст бони ӕрбацудӕй кадӕ. Уобӕл фӕсмон нӕ кӕнун. Фӕстӕдӕр мӕмӕ ку ‘рбацудайдӕ, уӕд, ка ‘й зонуй, батухстайнӕ. Нур ӕй зонун, кадӕ ци ‘й, уой. Неци!..

Фӕйнердӕмӕ ракӕсайтӕ: кади аккаг ӕгириддӕр ка нӕй, фулдӕр уӕхӕнттӕ сӕ уодӕй-уод кӕнунцӕ дзилли астӕу сӕхе искадгин кӕнунбӕл: фахъӕрати хузӕн сӕхецӕн корунцӕ цидӕр «ӕскъуӕлхт» ӕма «адӕмони» нӕмттӕ, сӕхе исуӕлиау кӕнуни зӕрдтӕй нарти кувдтитӕ аразунцӕ… Уотемӕй ба сӕхуӕдтӕ дӕр неци ӕма сӕ «кадӕ» дӕр нецӕййаг…

 

Лев Толстой (1828-1910) уруссаг финсӕг: «Раст над уӕхӕн ӕй: дӕ разӕй ка цардӕй, уони гъуддӕгутӕ базонӕ, балӕдӕрӕ сӕ ӕма идарддӕр цо!..»

Аци номдзуд адӕймаги зундгин загъдмӕ бӕргӕ ку байгъустайуонцӕ «Нӕуӕг Уӕрӕсе» аразгутӕ. Советон догӕ цийфӕнди кӕд адтӕй, уӕддӕр си берӕ уӕхӕн хуарздзийнӕдтӕ адтӕй, кӕцитӕ бафӕнзуйнагӕн бабӕзтайуонцӕ нӕ абони цардиуагӕ аразуни гъуддӕгути. Фал… Еци гъуддӕгутӕ ке къохти ‘нцӕ, етӕ Лев Толстой ӕма ӕндӕр уӕхӕн курухон лӕгти кӕсгӕ дӕр нӕ кӕнунцӕ. Дзӕгъӕли… Уони зундгин фӕдзӕхститӕ син бӕргӕ бабӕззиуонцӕ…

 

Владимир Ленин (1870-1924),
Советон паддзахади бундорӕвӕрӕг: «Адӕймагӕн аргъ кӕнунцӕ, ӕхуӕдӕг ӕхе туххӕй ци дзоруй, уомӕ гӕсгӕ нӕ, фал, ци аразуй, уомӕ гӕсгӕ…»

Фӕтӕг абони уоййасӕбӕл цӕстиварди нӕбал ӕй, уомӕ гӕсгӕ ба ин ӕ аци загъд кӕми фегъустайуонцӕ, мӕнӕ ӕвзурстити рӕстӕги сӕхе ӕстаунӕй ка нӕбал фенцайуй, етӕ… Адӕми аргъ ба син е фӕууй, ӕма сӕбӕл ходунцӕ… Уогӕ уӕддӕр си кадӕртӕ депутаттӕ дӕр иссӕнцӕ, хецаудзийнади дӕр ӕрахӕссунцӕ хиццаг бунӕттӕ…