28 майя 2022

ЗУНДГИН ЗАГЪД ФАТИ ХУЗӔН ӔЙ!..

05.04.2022 | 10:26

Недзаманти бердзейнаг финсӕг Эзоп ӕ фӕсномуг радзурдтӕй еуеми ракодта мӕнӕ ауӕхӕн хабар.

Цӕргӕс бӕрзонд къӕдзӕхӕй ратахтӕй ӕма дзогӕй уӕриккӕ раскъафта. Цъах ӕй фӕууидта, бахицӕ имӕ кодта ӕма ‘й бафӕндадтӕй уой бафӕнзун. Хъӕрахстгӕнгӕ ӕхе ниццавта фусбӕл. Фал ӕ дзӕмбутӕ фуси гъуни ниххастӕнцӕ, ӕхе ратонун нӕбал фӕразта, айдагъдӕр ма ӕ базуртӕй дзӕхст-дзӕхст кодта. Уӕдмӕ ‘й фиййау ӕрӕстӕфтӕй, батъӕбӕртт имӕ кодта ӕма ‘й ӕрахӕста. Ӕ базуртӕ ин ракъуӕрдта ӕма ‘й изӕри сӕхемӕ ӕ сабийтӕн ӕрхаста. Сабийтӕ ‘й фӕрсунцӕ, айӕ циуавӕр маргъ ӕй, зӕгъгӕ. Е син уотӕ:

– Ӕз ӕй зонун, цъах ке ‘й, уой, фал, ӕвӕдзи, ӕхуӕдӕг ба ӕхемӕ цӕргӕс кӕсуй!..»

Дӕхецӕй лӕгигъӕдгундӕр ка уа, уони хузӕн ацъагъуӕй кӕмӕ неци уа, уотемӕй ба сӕ ӕ фурсоцъайӕй фӕнзун ку байдайа, уӕд ӕй ӕ еци фӕндӕ хуарзмӕ не ‘ркӕндзӕнӕй – ӕхуӕдӕг дӕр фидбилизи бахауй, уӕдта ма иннетӕн дӕр ести бӕлӕхтӕ исаразуй.

Уӕлдайдӕр ба уӕхӕн хенвӕрсон хецауеуӕггӕнӕг ку исуй, уӕд гъуддӕгутӕ еугурӕй дӕр исӕмӕнтъери унцӕ. Уой фӕдбӕл алли адӕмихӕттити дзурддзӕугӕ лӕгтӕ нин берӕ зундгин зӕгъдтитӕ ниууагътонцӕ.

Рагонкитайаг гъудигӕнӕг Конфуцимӕ ес уӕхӕн фӕдзӕхст: «Ахургӕнӕг загъта: «Ӕууӕнкӕ кӕбӕл нӕййес, уӕхӕн адӕймаги хӕццӕ ести гъуддаг исаразӕн куд ес? Уӕрдунӕн сӕмӕн ку нӕ уа, уӕд цӕуӕн куд ес?..»

Мах ба Советон Цӕдеси фехӕлди фӕсте Уӕрӕсей цардаразӕн гъуддӕгутӕ дӕр раст гъе уӕхӕнтти къохти бакодтан. Ӕма етӕ дӕр, кӕд дзоргӕ уотӕ кодтонцӕ, гъома, нӕ Фидибӕсти ӕма нӕ адӕми хуарзбӕл косӕн, зӕгъгӕ, уӕддӕр сӕ архайд ба ӕнӕгъӕнӕй дӕр адтӕй айдагъдӕр сӕхе пайдайӕн. Сӕ мӕнгарддзийнадӕ уа нӕ уа, уӕддӕр ке раргом уодзӕнӕй, уой лӕдӕргӕй сӕ ӕдзӕсгонӕй «бакуст» мулкитӕ фӕсарӕнти ӕрримахстонцӕ. Беретӕ ба си сӕхуӕдтӕ дӕр уордӕмӕ фӕлледзӕги ‘нцӕ…

Номдзуд уруссаг финсӕг Антон ЧЕХОВ (1860-1904) финста: «Ӕцӕгӕлон ин ка ‘й, уӕхӕн гъуддагбӕл (зӕгъӕн, аййевадӕбӕл) ӕхе тухнихӕст ка бакӕнуй, уомӕй, гъай-гъайдӕр, исфӕлдистадон ӕгъдауӕй неци рауайуй ӕма ӕнӕмӕнгӕ чиновник исуй…»

Циуавӕр чиновниктӕ си рауайуй ӕма цӕмӕйти «фескъуӕлхуй», уой ба нӕхуӕдтӕ уинӕн – айдагъ нӕ культури нӕ, фал нӕ абониккон цардарӕзти берӕ ахсгиаг къабӕзти ӕдзӕллаг уавӕрӕй. Нӕ рагфидтӕлтӕ хумӕтӕги нӕ зӕгъиуонцӕ: «Ӕнарӕхсгӕ – ӕнамонд аразӕг!..»

 

Немуцаг философ Фридрих НИЦШЕ (1844-1900) еу хабар ракодта. Цидӕр бӕрнон бунати ӕвӕруйнаг ке адтӕнцӕ, е загъта: «Е мӕ зӕрдӕмӕ нӕ цӕуй…» Бафарстонцӕ ‘й: «Цӕмӕннӕ?..» Загъта син: «Уомӕн ӕма уой уӕнгӕ нӕ исирӕзтӕн!..» Ӕма си хатдзӕг искодта: «Цума уотӕ ескӕд зӕгъдзӕнӕй уӕддӕр еу адӕймаг?..»

Кунӕг!.. Абони ‘й нӕ уинӕн, нӕ алфамбулай цӕйбӕрцӕ ес уӕхӕнттӕ, кӕцитӕ сӕхуӕдтӕ сӕ нецӕййагдзийнадӕ лӕдӕргӕй, еци бурсӕги-бурсунцӕ хецаудзийнади бӕрнон бунӕттӕ байахӕссунмӕ, депутаттӕ ӕма политиктӕ исунцӕ… Цума некӕд фегъустайуонцӕ нӕ рагфидтӕлти загъд: «Фонс ӕгомуг ӕй, фал ӕ бунат зонуй!..»