Рагон хабар: Дзуццатӕ ӕма Цъӕхилтӕ сӕ урситӕ ӕргъаумӕ ку бакӕниуонцӕ, уӕд, дан, Дзуццати урс тухгиндӕр кодта Цъӕхилти уонбӕл. Етӕ дӕр уӕд сӕ урс ӕргъауӕй сӕхемӕ ӕркодтонцӕ ӕма имӕ еу мӕйи дӕргъи хуарз фӕккастӕнцӕ хуарӕй. Уӕдта бабӕй ӕй ӕргъаумӕ рауагътонцӕ. Ӕма Дзуццати урс Цъӕхилти уони билӕй расхуста. Уой фӕдбӕл дууӕ муггагей ӕхсӕн тугъд райеудагъ ӕй, сӕ фӕндӕ адтӕй сӕ кӕрӕдзей бустӕги, сауӕнгӕ сабийти уӕнгӕ, ниццӕгъдун.

Еци ӕверхъау фӕндӕ базонгӕй, Дӕргъӕвси ком ӕрӕмбурд ӕй, сабуртӕ сӕ кӕнунцӕ, фал сӕмӕ дууердигӕй дӕр игъосӕг нӕ адтӕй. Ӕма уӕд, дан, Дауратӕй нӕуӕг киндзӕ ӕ киндздзон дзаумау искодта. Сувӕллони къохбӕл ниххуӕстӕй ӕма уотемӕй тохгӕнгути бӕрӕгастӕу ӕрлӕудтӕй, ӕ рахес къохӕй хизи кӕронбӕл исхуӕстӕй. Фефсӕрми си ӕнцӕ… Уоййадӕбӕл дууӕ муггаги бафедудтонцӕ, уарзон синхӕгтӕй цӕрун байдӕтонцӕ, кӕрӕдзей медастӕу ма хӕстӕгутӕ дӕр иссӕнцӕ…

***

Бӕргӕ, нури ӕзмӕнст рӕстӕгути дӕр еци Даурати киндзи хузӕн еске ку фӕззиннидӕ – кӕдимайди ба, абони хецӕн адӕймӕгутӕн дӕр ӕма дзиллитӕн дӕр фидбилизхӕссӕг миутӕ ка аразуй, етӕ сӕ кеми ӕрцӕуиуонцӕ ӕма зӕнхӕбӕл ралӕууидӕ сабур, амондхӕссӕг цард.

Шарль де КОСТЕР (1827-1879), бельгийаг финсӕг: «Нӕдӕр адӕймагӕн, нӕдӕр фиртонӕн макӕд есӕ ӕ сӕребарӕ – зӕнхӕбӕл агъазиаудӕр хуӕрзӕгадӕ. Макӕд маке хъор кӕнӕ, уазал ин ку уа, уӕд хе хормӕ тавунӕй, ӕма хораууони хе сатӕг кӕнун, тӕвдӕ ин ку уа, уӕд…»

Аци гъуди, ӕвӕдзи, некӕд фегъустонцӕ, дуйней иннӕ адӕмти сӕхе фӕндитӕмӕ гӕсгӕ цӕрунмӕ ка фӕлгъауй, фудзӕрдӕй  Донбасс аст анзей  дӕргъи ка гъезӕмарӕ кӕнуй, Уӕрӕсе ӕрлӕмӕгъ кӕнуни зӕрдтӕй ӕ нихмӕ фудмиутӕ ка аразуй, етӕ…

Николай ДОБРОЛЮБОВ (1836-1861), литературон критик, публицист: «Фиццагидӕр ибӕл ка исӕмбӕлуй, уой зӕрдӕмӕ фӕццӕуни фӕндӕй ӕ цӕстирахаститӕ ка феййевуй, еци адӕймаги нимайӕн нецӕййагбӕл, ӕнаккагбӕл, кӕцимӕ нецихузи зундирахаст ес…»

Ӕма гъе уӕхӕн, асланӕй-асландӕр хъахбайти хузӕнттӕй сӕхе нӕ равдистонцӕ, ӕрӕги дӕр ма Уӕрӕсейӕн сӕ хӕлардзийнадӕ ӕма еузӕрдиуондзийнадӕй ка сомитӕ кодта, парахаттӕй си ка пайда кодта, еци паддзахӕдтӕ? Фал Америки Еугонд Штаттӕ ӕма уой халдех «хуӕрзгӕнгутӕ» сӕмӕ цидӕр «битиртӕй» ку рамус-мус кодтонцӕ, уӕдта уайтӕккӕдӕр уони ӕмдзӕхдон фестадӕнцӕ, мах ба сӕ фудӕзнаг фестун кодтонцӕ…

Чарльз ДИККЕНС (1812-1870), англисаг финсӕг: «Адӕймаг ӕ цардихӕс, цийфӕнди ку уа, уӕддӕр гъӕуама аргъоц кӕна ӕма агъаз кӕна ӕ еци цардихӕси аккагдзийнадӕ, уӕдта иннетӕй дӕр гъӕуама дӕма уой аргъоц кӕнун, цийфӕнди ку уа, уӕддӕр…»

Ӕма ӕ цардихӕсбӕл айдагъдӕр иннети сайун, фӕливд, ӕдзӕсгон, ӕндӕр ӕнаккаг миутӕй ӕ карнӕ аразун ка нимайуй, е рӕстзӕрдӕ адӕймагӕй куд гъӕуама дӕма уӕхӕн аргъоц? Уогӕ нӕ абони цӕстиварди фулдӕр уӕхӕнттӕ «цитгингонд» цӕунцӕ – хецаудзийнади, ӕфсади, барадон къабӕзти бадгутӕй еугурадӕмон есбойнадӕй хе багъӕздуг кӕнуни равгӕ кӕмӕн ес, уонӕй си беретӕ ӕнауӕрдгӕй пайда кӕнунцӕ. Ӕма уӕхӕнттӕн нӕ сӕртӕй ниллӕг цӕмӕн гъӕуама ковӕн?