Дам-думтæ парахат кæнунбæл æхцул фæрæзнитæ æрæги фегъосун кодтонцæ, фиццаг августæй фæстæмæ, дан, нуриуæнгæ лæвар ци медицинон лæггæдтæ æнхæстгонд цудæнцæ, уонæй кæцидæртæбæл гъæудзæнæй федун. Еци «хабар» мæнгæ ке ’й, уой туххæй сæрмагондæй игъосун кæнуй Уæрæсей æнæнездзийнадæ гъæуайкæнуйнади министрадæ. Ведомстви разамонæги агъазгæнæг Алексей Кузнецов куд зæгъуй, уотемæй медицинон агъази еугур хузтæ дæр – сæ хæццæ æвæстеуатон, уæдта стационарти æма æмбулаторити ке ’нхæст кæнунцæ, еци пъланон агъаз æма хуастæй ефтонгадæ еугурæйдæр уодзæнæнцæ лæвар, паддзахадон зæрдæдарæнти программæмæ гæсгæ.