22 майя 2024

ÆРГОМ КУСТ КÆНУН – ХУÆЗДÆР

13.05.2023 | 10:56

Аууони куст кæнун нæ уадзунæн мадзæлттæ аразуни ведомствити ’хсæн къамисæн адтæй æмбурд. Амудта ’й Республикæ Цæгат Иристон-Аланий Хецауади Сæрдар Дзанайти Барис.

Аци анзи фиццаг кварталмæ исбæрæг æнцæ аууони кустгæнæг 2 мин адæймагемæ хæстæг. Уонæй нуриуæнгæ 1700 адæймаги еци аууонæй рацудæнцæ æма сæ фæллойнадон рахастдзийнæдтæ исаразтонцæ гъæугæ фæткæмæ гæсгæ сæхе, куд хеамалгъонтæ исæвардтонцæ хигъди. Адæмæн кусти бунæттæ дæттуни комитети разамонæг Плати Альбини дзубандимæ гæсгæ, аци гъуддаги хуæздæр бæрæггæнæнтæ ’вдесунцæ сахар Дзæуæгигъæу, уæдта Дигори, Ирæфи æма Æрæдони районтæ.

Муниципалон къамистæ раргом кæнунцæ, сосæггай аууони ка косуй, айдагъ уæхæн адæймæгути нæ, фал æнæ паддзахадон регистрацийæй ка косуй, хеамалеуæггæнæг уæхæн субъектти дæр.

Профилон комитети разамонæг куд бафеппайдта, уотемæй еци хузи паддзахадон агъази фæрци евгъуд анзи фæцæй санкцити уæзæ фæмминкъийдæр кæнуни гæнæн. Уой фæрци кустдæтгутæ сæ косгутæн мизд федуни фондæн фæстауæрцæ искодтонцæ 50 миллион соми. Еци мадзæлтти архайдтонцæ 72 кустдæттæги.

Паддзахадон агъази мадзæлттæй разæнгардæй пайда ка кæнуй, уонæй еу æй Ирæфи райони хуйæн фабрикæ. Æ разамонæг Таухъазахти Ирбег куд радзурдта, уотемæй адæмæн кусти бунæттæ дæттуни комитети хæццæ æмархайди фæрци, æма син 2022-2023 æнзти 3 миллионей бæрцæ субсидитæ лæвæрд ке ’рцудæй, уой фæрци сæ къохи бафтудæй 42 косæн бунати багъæуай кæнун. Уомæй уæлдай, хуйæн фабрикæ архайуй æнагъонтæн рæстæгмæ кусти бунæттæ дæттуни программи дæр.

Премьер-министри дзубандимæ гæсгæ, уæлдай æргом раздахун гъæуй ахургæнæндæнтти рауагъдонтæн кусти бунæттæ аразунмæ, уæдта, туризм республики парахат кæнунмæ, уомæ гæсгæ аци къабази косгутæ цæттæ кæнуни гъуддагмæ дæр.

– Нæ республикæ дæсни специалисттæ цæттæ цæмæй кæна, уомæн ин ес еугур фадуæттæ дæр. Æнхæстгонд нæмæ цæунцæ агъазиау инвестицион проекттæ. Айдагъ фондз проектей фæлгæти нæмæ гъæуама фæззинна 8 мин косæн бунати. Косгутæ ба сæмæ цæттæ кæнун гъæуй, абонæй фæстæмæ райдайгæй, – бафеппайдта Хецауади Сæрдар.