30 майя 2023

ЦАУТÆ. ХАБÆРТТÆ

20.05.2023 | 13:58

Зундгонд куд æй, уотемæй аци анз Цæгат Иристони нимад цæуй куд Нартиади Анз. Уой фæлгæти æрæги Туйгъанти Махарбеги номбæл Аййевадон музейи байгон æй, нуриуæнгæ арæзт ка нæма æрцудæй, уæхæн тематикон равдист. Фæууинæн си ес алли жанрти куститæ: хузæкæнуйнадæ, скульптурæ, графикæ, уæдта ма нæ адæми рагон дзаумæуттæ…

* * *

Уæрæсей премьер-министр Михаил Мишустин куд фегъосун кодта, уотемæй нæ паддзахадон бюджетæй 4,5 миллиард сомемæй фулдæри бæрцæ лæвæрд æрцæудзæнæй нæ бæсти авд регионемæн, се ’хсæн Цæгат Иристон дæр. Æхцай еци фæрæзнитæ гъæуама харзгонд æрцæуонцæ нæуæг скъолатæ аразунæн.

* * *

Национ наукон киунугæдони байгон æй аллианзон равдист «Иристони æвзонгадæ». Фæууинæн си ес нæ æригон хузæгæнгути, Цæгат Иристони Хетæгкати Къостай номбæл паддзахадон университети сорæттæгæнæн аййевади факультети Дзæуæгигъæуи Дзанайти Азанбеги номбæл аййевадон училищей, нæ бæсти централон ахургæнæндæнтти рауагъдонтæ æма студентти куститæ.

* * *

Цæгат Иристони фиццаг июнæй фæстæмæ косун райдайдзæнæй сæрмагонд æфсæддон операций архайгутæн агъаз кæнуни регионалон Фонд. Куд нисангонд цæуй, уотемæй нæуæг фонди фæрци сæрмагонд æфсæддон операций архайæг æфсæддон службæгæнгутæн арæзт цæудзæнæй социалон, медицинон, психологон æма æндæр агъази мадзæлттæ.

* * *

«Абилимпикс» – уотæ хуннуй, Дзæуæгигъæуи ка райдæдта, еци регионалон чемпионат «Уæрæсе – фадуæттæ æма гæнæнти бæстæ».

Архайдзæнæнцæ си æдеугур 110 сахъат адæймаги, уони хæццæ 14 анземæй фулдæр кæбæл нæма цæуй, уæхæн 32 скъоладзауи, 73 студенти æма 5 специалисти, ерис кæндзæнæнцæ аллихузон дæсниæдти фæлгæти, уоми уодзæнæнцæ уæледарæс бийун, хуйун, къеретæ кæнун, хуæдтолгитæ цалцæг кæнун, райдайæн кълæсти ахургæнæги куст, хуæруйнаг кæнун æма æндæртæ. Уомæй уæлдай, архайдзæнæнцæ æндæр мадзæлтти дæр.

Аци анз ма нæ региони уæхæн цæмæдесаг еристæ рацæудзæнæнцæ уæлдæр ахургæнæндæнтти ’хсæн, æцæг айдагъдæр еу дæсниадæбæл: «Райдайæн кълæсти ахургæнæг». Хуæздæр бæрæггæнæнтæ ка равдеса, етæ ба октябри мæйи  цæудзæнæнцæ Мæскумæ еугуруæрæсеуон еристи архайунмæ.

* * *

Дзæуæгигъæуккаг фæсевæди Галауани сæрди кæронмæ рахецæн уодзæнæнцæ цалцæггæнæн куститæ. Уой фæдбæл фæсевæди гъуддæгути фæдбæл республикон Комитети сæрдар Джусойти Руслан уотæ зæгъуй:

– Фиццаги-фиццагидæр, байархайдзинан, цæмæй концерттæ аразæн æма репетицион залти, уæдта галауани иннæ бæстихæйтти æвæрд æрцæуа нæуæг гъаргæнæн системæ. Цалцæггонд æрцæудзæнæй, театр «Амыран» репетицитæ кæми кæнуй, еци минкъий зал дæр. Ке зæгъун æй гъæуй, цалцæги фæсте залти исæвæрун гъæудзæнæй акустикон, рохсгæнæн æма æндæр уæхæн техникон фæрæзнитæ.