Зундгонд куд æй, уотемæй Дзæуæгигъæуи берæфатерон цæрæн хæдзæртти бундорон цалцæги фæдбæл республикон программи фæлгæти 2025 анзи уæнгæ гъæуама æййивд æрцæуонцæ 210 лифти. Профилон ведомствити минæвæртти игъосункæнуйнагмæ гæсгæ, нерæнгæ бал æвæрд æрцудæнцæ 44 лифти. Анзи кæронмæ ма уонæбæл бафтуйдзæнæй никкидæр 50 лифти.

* * *

Нæ республики туристон инфраструктури райрæзти нисантæмæ гæсгæ, зæгъæн, Дзæуæгигъæуи ци нæуæг туристон объекттæ арæзт æрцæудзæнæй, уонæй еу уодзæнæй нуриккон санаторон-курортон комплекс. Хуæнхаг районти ба – Дæргъæвси интерактивон музей фæндаггон инфраструктури объектти хæццæ, Фæснæли фæлладуадзæн центр æма фусунуат, Мидæгрæбини æхсæрдзæнтæмæ хæстæг туристон кемпинг æма уотæ идарддæр.

* * *

Республики финансти министри ихæстæ æнхæстгæнæг Исахъти Олеги дзубандимæ гæсгæ паддзахадон æлхæнуйнæгтæ кæнуни куст ахедгæдæр кæнун агъаз æй системи автоматизацигонд центри архайд. Уой специалистти фæрци, зæгъæн, айдагъ июни федаргонд æрцудæй 64 бадзурди, сæ аргъ – 12,4 миллион соми. Уой хæццæ ба ма, нæуæг центри равналæнтæй пайда кæнгæй, фæстауæрцæгонд æрцудæнцæ паддзахадон фæрæзнити 956 мин соми.

* * *

Цæгат Иристони арæзт æрцудæй дони объектти номхигъд. Нерæнгæ бал куд бæлвурдгонд æрцудæй, уотемæй нæ республики ес 398 дони уæлæнгай объектти. Аци анз ма идарддæр цæудзæнæй уони рауæнтæ æма билгæрон арæнтæ, уæдта сæ гъæуай кæнуни фæдбæл мадзæлттæ фæббæрæг кæнуни фæдбæл куст.

* * *

Ирæфи райони хуæдтолгитæй цæунæн нæдтæ фæннæуæгдæр кæнуни туххæй куститæн дехгонд цæуй 47,5 миллион соми. Зæгъун гъæуй уой, æма, бунæттон ахедундзийнадæ кæмæн ес, еци нæдтæй нерæнгæ бал цалцæггонд æрцудæй 9,9 километри.