2023 анзи фиццаг æмбеси Цæгат Иристони банктæ республики цæргутæн 2023 анзи фиццаг æмбеси фæлхасадон æма æндæр æфстæутти хузи равардтонцæ 37 миллиард сомей бæрцæ (2022 анзи еци æмгъуди хæццæ рабаргæй 1,8 хатти фулдæр).

***

Цæгат Иристони цæргутæй æгуст ка ‘й æма официалон æгъдауæй профилон ведомстви регистрацигонд ка ‘рцудæй, еци адæми нимæдзæ æй 3 миней бæрцæ. Адæмæн куст дæттуни фæдбæл архайæг республикон служби минæвари загъдмæ гæсгæ, фæллойни базари карздзийнади къæпхæн дæр рæстæмбес нимадæй бæрзонд нæй – 2,5 еуæги (гъома, еу уæгъдæ косæн бунати хигъдмæ регистрацигонд æрцудæнцæ дууæ æгуст адæймаги).

***

Аци анз Еугуруæрæсеуон фæсевæдон форум «Машук»-и архайуни туххæй курдиæдтæ балæвардтонцæ аст мин адæймагемæй фулдæр. Мадзал цæугæ ба кæндзæнæй цалдæр кезуемæй – 12 августæй 26 августи уæнгæ. Сæ архайгутæ исуодзæнæнцæ ахургæнгутæ æма уæлæнхасæн ахурадæ æма гъомбæлади специалисттæ, гъомбæлгæнгутæ æма библиотекити косгутæ, уæлдæр æма астæуккаг профессион ахуради косæндæнтти студенттæ, блогертæ, нæуæгдзаути раздзæугутæ æма уотæ идарддæр. Форуми организацион комитети унаффæмæ гæсгæ, аци анзи форуми сæйрагдæр темæбæл нимад æрцудæй Ахургæнæг æма зундамонæги анз.

***

Национ проектти уагæвæрдтæ æнхæст кæнунæн 2023 анзи Цæгат Иристони нисангонд æрцудæй 9,3 миллиард сомей бæрцæ. Анзи æмгъудæн ци пълантæ арæзт æрцудæй, етæ æнхæстгонд цæунцæ афойнадæбæл. Еумæ райсгæй, национ проектти уагæвæрдмæ гæсгæ, республики арæзт æма бундоронæй цалцæггонд цæунцæ 150 аллихузон ахсгиаг объекти. Еци нимæдзæй 21 объектей арæзтадæ нуриуæнгæ рахецæн æй, 25 объектемæн ба сæ цæттæдзийнади къæпхæн 80 процентемæй фæффулдæр æй.

***

Уæрæсей Хецауади сайт куд фегъосун кодта, уотемæй Цæгат Иристон сувæллæнтти фæлладуагъди къабази райрæзтæн уæлæнхасæн райсдзæнæй 28,4 миллион сомей бæрцæ фæрæзнитæ.