26 февраля 2024

ХАБÆРТТÆ. ЦАУТÆ.

16.09.2023 | 15:22

Ахурадон уагæдæнтти рауагъдонтæй куст фиццаг хатт ка агоруй, уонæн сæ стажировки туххæй нæ республики кустдæттæг центр феддзæнæй æхца. Уой туххæй центри специалисттæ баунаффæ кодтонцæ кустдæтгути, Фæсевæдон парламенти æма студентти хæццæ фембæлди. Уой фæрци, ка ’й зонуй, фæмминкъийдæр уодзæнæй, нуртæккæ нæ республики ка нæ фагæ кæнуй, еци специалисттæй (дохтиртæ, инженертæ, ахургæнгутæ æма æнд.) кадавардзийнадæ.

*  *  *

Уæрæсей фæлхасадон цæстдарди цæгатиристойнаг управлени куд игъосун кæнуй, уотемæй нæ республики бабæй ралæудтæй карз вирусон инфекций афонæ. Раст зæгъгæй, уавæр уоййасæбæл уæззау нæй. Евгъуд къуæрей региони исбæрæг кодтонцæ коронавирусæй фондз сæйги. Коронавирусон инфекци нимад цæуй карз респираторон вирусон инфекцибæл. Адæм профилактикон домæнтæ ку æнхæст кæнонцæ, уæд нез нæ рапарахат уодзæнæй.

*  *  *

Нæ республики зæнхкосгутæ фæззигон культурити тиллæгæй нерæнгæ бал æрæмбурд кодтонцæ 143 мин тонни. Гъæууон хæдзаради минæвари загъдмæ гæсгæ, Цæгат Иристони айдагъдæр нартихуари куст кæнунцæ, зæгъгæ, гъуди. Аци анз нæ будурти исцæттæ ’й хъæдори, рапси, бæлтæрнай, хлепай, тумбул хъæдори æма ма берæ уалдзигæнди æндæр культурити тиллæг.

*  *  *

Аци анзи райдайæнæй нуриуæнгæ æрцудæй 826 зингиссугъди. Фæммард си æй 7 адæймаги, фæййервæзун си кодтонцæ 11, æдас рауæнмæ еуварсгонд æрцудæнцæ 876 адæймаги. Гъæуайгонд æрцудæй 360  780 000 сомей аргъ материалон хæзнатæ. Зингиссугъдтитæ фулдæр хæттити æрцæунцæ, сор кæрдæг игон рауæнти ке фæццæфсуй, уой фудæй. Хуарз æй е, æма сувæллæнтти фудуагдзийнæдти фудæй уæхæн бæлæхтæ не ’рцудæй.

*  *  *

Куд гъавунцæ, уотемæй аци анз октябри Дзиуаригъæуи байгон уодзæнæй агрогъæу «Иристони гъæу». Уой фæзуати арæзт æрцæудзæнæй дæс æма дууинсæй адæймагей фагæ фондз хæдзарæгонди. Ка си æрбунат кæндзæнæй, еци бæлццæнттæ косдзæнæнцæ аллихузон гъæууонхæдзарадон кустити. Агрогъæутæ нæ республики исаразуни проекти туххæй бæлвурддæрæй цæуй дзубанди, абони 8-аг фарсбæл ци æрмæг мухур кæнæн, уоми..