Цæгат Иристони автономий сæдæ анзей кадæн 2024 анзи гъæуама уагъд æрцæуонцæ почти сæрмагонд маркъитæ, блоктæ, фæлгонцгонд уодзæнæнцæ нæ республики туххæй хузæгæндтитæй.

* * *

Мæздæги æма Горæтгæрони районти фæззиндзæнæнцæ адæмæн социалон лæггадæ кæнуни центртæ. Бæрæггонд æрцудæнцæ, етæ кæми арæзт æрцæудзæнæнцæ, еци рауæнтæ.

* * *

Гæнæн ес, æма Цæгат Иристони дæр фæззиндзæнæй ботаникон дзæхæра. Уой исаразунæн фæййагъаз кæнуни туххæй сæрмагонд бардзурд нæ республики минæвæрттæ бафинстонцæ Хъирими номдзуд Никитаг ботаникон дзæхæрай разамунди хæццæ.

* * *

Регионти еумæйаг аллианзон равдист «Цæгат Иристони будури Бон» аци хатт арæзт æрцæудзæнæй Беслæни. Фæууинæн си уодзæнæй аграрон къабази нæуæгдзийнæдтæ, аллихузон гъæууонхæдзарадон техникæ.

* * *

Аци анз Цæгат-Кавказаг хуæнхон-металлургон институти арæзтадон отряд – уодзæнæй си 257 студенти – кустадон практикæ рацæудзæнæнцæ кустуат «Норильскникельремонт»-и. Зæгъун гъæуй уой дæр, æма аци кустуати структурон дæлкъабæзти алли анз дæр кустмæ райсунцæ институти дæс æма дууинсæйемæй фулдæр рауагъдони.

* * *

Суанти Кими номбæл эстрадон оркестрбæл исæнхæст æй дæс æма инсæй анзи. Уой фæдбæл æрæги Цæгат Иристони паддзахадон университети концертон зали номдзуд коллектив исаразта юбилейон концерт.

* * *

Æрæдони райони Бехъани поселокки байгон æй нæуæг фельдшерон пункт. Фарæ ба нæуæг амбулатори байгон æй аци райони Къостайгъæуи. Мæздæги райони ба Павлодольскийи станици капиталон цалцæги фæсте нæуæгæй ахуртæ райдæдтонцæ бунæттон скъолай.

* * *

«Æрхъолагонд Сталингради цæрæг», зæгъгæ, нисан кæмæ ес, еци адæймæгутæ Устур Фидибæстон тугъди ветерантæбæл нимад куд цæуонцæ, уæхæн закъони проекти фарс æнцæ Цæгат Иристони депутаттæ дæр. Сæ еци фæндæ фегъосун кодтонцæ Парламенти совети. Гъæуама уонæн дæр паддзахади ’рдигæй лæвæрд цæуонцæ социалон агъази лæггæдтæ.