Уæрæсей Президент Владимир Путин байхæс кодта, цæмæй нæ бæсти 2028 анзи уæнгæ цæттæгонд æрцæуа, кустадон къабæзти ахсгиагæй ка гъæуй, уæхæн дæсни специалисттæ – тæккæ минкъийдæр еу миллиони бæрцæ. Нæ республики ес 27 астæуккаг профессионалон ахургæнæндони, алли дæсниæдтæбæл си нуртæккæ ахур кæнунцæ 19 мин студентемæй фулдæр, гъома, уæлдæр ахургæнæндæнтти студентти бæрцæмæ хæстæг.

*  *  *

Сæрмагонд ахурадон æма профориентацион проект «Билет исонибонмæ»– йи цæгатиристойнаг скъоладзаутæй ка архайуй, уони нимæдзæ фæстаг фондз анземæ иссæй 28 миней бæрцæ. Уонæй беретæ сæхе бавзурстонцæ программист, хуæруйнаггæнæг, гъæдикустгæнæг, лабораторон æртасæг æма æндæр бунæтти.

*  *  *

Нæ республики цуппар æма цуппаринсæй фермерон  хæдзаради æма дууæ гъæууонхæдзарадон фæлхасадон хæдзарадæн лæвæрд æрцудæй грантти хузи агъазгонд – æдеугурæй 301 миллион соми. Еци гъуддаг æнхæстгонд цæудзæнæй идарддæр дæр.

*  *  *

Цæмæй нæ республики скъолати ахурадзаутæн си гъæугæ фадуæттæ уа физикон культурæ æма спортæй архайунæн, уой туххæй нæуæггонд цæунцæ материалон-техникон равгитæ. Нерæнгæ ба еци гъуддаг кæрæй-кæронмæ æнхæстгонд æрцудæй æртиндæс æма инсæй скъолайеми. Аци анз ба ма уотæ ефтонггонд æрцæудзæнæнцæ никки авд ахургæнæндони.

*  *  *

Цæгат Иристонæй сæрмагонд æфсæддон операци æнхæсткæнуйнади рауæнтæмæ бабæй æрвист æрцудæй гуманитарон агъаздзийнадæ – хуайраг, гъар уæледарæс, кæдзосгæнæн фæрæзнитæ, уæдта æфсæддонти равгæ нивæбæл кæнунæн агъазгæнæг финстæгутæ.

Еци гъуддаг исаразунæн фадуæттæ исаразта Цæгат Иристони Богдан Хмельницкийи номбæл украинаг национ-культурон æхсæнадæ «Славутич».

Аци хуæрзауодæн гъуддаги акций архайдтонцæ нæ республики Адæмти хæлардзийнади хæдзарæ, национ-культурон æхсæнæдтæ, Дзæуæгигъæуккаг епархи, Колити Аксой номбæл киристон гимнази, скъола «Эрудит», 91-аг рæвдауæндонæ æма бархеуонтæ.