Цæгат Иристони экономики ирæзти министри фиццаг хуæдæййевæг Олег Быкадоров СЦТА-йи уацхæссæгæн куд радзурдта, уотемæй 2023 анзи фæсарæнтæмæ нæ республики агропромышленнон комплекси продукци æрветуни ихæс æнхæстгонд æрцудæй 4,4 хатти фулдæремй.

Еци продукцимæ хаунцæ хуар æма сойаги культуритæ, картофи муггаг, рæзæ, дон æма спъирти тæвагæ кæмæ нæ хъæртуй, уæхæн ниуæзтæ. Фулдæр æрвист цудæй Гурдзимæ, Абхази, Узбекистан, Турк, Азербайджан, Сомех, Киргизи æма Белоруссимæ.

Еумæ райсгæй, евгъуд анзи нæ республикæй уæлдæр амунд паддзахæдтæмæ æрвист продукций аргъ исхъæрдтæй минкъий гъæуангæ 198 миллион доллæремæ, ихæс 45,2 миллион доллæри уогæй.

*  *  *

Донефтонгади æма дон еуварс уадзæн цæгатиристойнаг кустуат æрæги райста нæуæг техникæ: фондз хуæдтолги, «УАЗ-фермер», авд хуæдтолги «Лада Гранта», дууæ хуæдевдæлонгæнæн хуæдтолги «Shacтан».

*  *  *

Евгъуд анзи аэропорт «Дзæуæгигъæу» æгасцæуай загъта 900 мин бæлццонемæн – е æй, уой размæ анзи хæццæ рабаргæй, финддæс процентти фулдæр.

*  *  *

Агротуристон гъæугонд исаразуйнаг æнцæ Æрæдони райони. Уоми иуазгутæн исараздзæнæнцæ минкъий хæдзæрттæ æма сæ зонгæ кæндзæнæнцæ, гъæууон-хæдзарадон куститæ куд æнхæст кæнгæ ’нцæ, уой хæццæ. Уой туххæй ба си уодзæнæй кæсæлгити цадæ, минкъий фермæ, спортивон æма сувæллæнтти фæзтæ… Аци гъуддаги фæззиндзæнæй инсæй косæн бунати, бюджетмæ феддонтæ ба исхъæртдзæнæнцæ æстдæс миллион сомей уæнгæ.

*  *  *

Цæгат Иристони культури министр Фидарати Сослан куд фегъосун кодта, уотемæй нæ республики культури хуæздæр уагæдæнттæ æма сæ косгутæ хуарзæнхæгонд цæудзæнæнцæ æхцай премитæй. Аци анзи бæрæггæнæнтæмæ гæсгæ исбæлвурд уодзæнæнцæ культури цуппар хуæздæр косæги æма гъæууон культурон æртæ артдзæсти. Аци гъуддагæн национ проект «Культурæ»-йи фæлгæти федералон æма республикон бюджеттæй дехгонд цæуй 500 мин соми.