Нæ республики ахурадæ æма науки министр Алибегти Эллæ  куд фегъосун кодта, уотемæй Цæгат Иристони историй ахургæнæн киунуги къохфинст цæттæгонд фæцæй æма ‘й рарвистонцæ Уæрæсей наукити Академимæ. Министр æ радзубандий куд баханхæ кодта, уотемæй нæ республики Сæргълæууæг Сергей Менялой бардзурдмæ гæсгæ аци анзи райдайæнæй фæстæмæ нæ республики скъолати ахургæнæн программитæмæ хаст æрцудæй сæрмагонд курс «Иристон – мæ истори» («Осетия – моя история»). Æма мæнæ ци ахургæнæн киунуги кой цæуй, е ахургæнгутæн дæр æма ахурдзаутæн дæр исуодзæнæй зингæ агъазгæнæг фæрæзнæ.

***

Федералон проект «Спорт-царди медес»-и фæлгæти Дзæуæгигъæуи спорти Галауани арæзт æрцудæй регионалон мадзал «Цæттæ дæн фæллойнæ æма гъæуай кæнунмæ» (ГТО). Сæ арæхстдзийнадæ си спортивон-физкультурон алли хузти æвдистонцæ нæ республики ахурадон косæндæнтти æригон минæвæрттæ.

***

Республики скъолатæн идарддæр дæр лæвæрд цæунцæ автобустæ. Сæ медæгæ уодзæнæй ЛОНАСС-и системæ, тахографтæ, дзуапп дæттунцæ æдасдзийнади еугур домæнтæн дæр.

Национ проект «Ахурадæ»-йи фæлгæти ма 1 сентябрмæ ахурадон уагæдæнттæн лæвæрд æрцæудзæнæй дууæ æма инсæй автобуси, уонæй инсæй – гъæууон скъолатæн. Уой фæрци скъоладзаутæн сæ бон уодзæнæй Дзæуæгигъæумæ экскурсити, музейтæмæ æма театртæмæ цæун. Уæлдай лæмбунæгдæр кæсдзæнæнцæ, кустмæ ци шофертæ есонцæ, уонæмæ.

***

Нæ республики анзмæ цæрæнуæтти квадратон метр фæхъхъазардæр æй  35,7 проценти. Уотемæй, нæуæгарæзт хæдзари фатерæн нур æ метри аргъ æй 132  100 соми, зæронд хæдзари ка ‘й, уæхæн фатерæн ба – 123  230 соми. Фарæ аци афони дæр ма нæуæг фатери квадратон метр балхæнæн адтæй 120  430 сомемæй, зæронд ба – 113 905 сомемæй.

Уæрæсей цæрæнуат балхæнунæн е æй тæккæ фулдæр бæрцæ, фал, еумæ райсгæй, иннæ рауæнти дæр бæрзонддæргæнгæ цæуй, æрæги уæнгæ ци ипотекон программити адтæнцæ, уони фæрци.