14 июня 2024

ХАБÆРТТÆ. ЦАУТÆ. НИСАНТÆ.

02.12.2023 | 22:03

Цæгат Иристонæн æхеми ке куст кæнунцæ, уонæй уæлдай ма нæмæ рæзæ æма халсартæ ласт цæунцæ фæсарæнтæй дæр: нерæнгæ бал Гурдзийæй æрбаластонцæ 44 мин тонни, Туркæй – 1513 тонни, Узбекистанæй нæмæ исæрвистонцæ гъæдзиндзи 66,9 тонни, Азербайджанæй – балити 19 тонни æма кæрдтути 19,4 тонни.

*  *  *

Туйгъанти Мухарбеги номбæл Аййевадон музейи рæхги гъæуама райдайонцæ цалцæггæнæн куститæ. Уомæн дехгонд цæуй 10 миллион соми. Куд нисангонд цæуй, уотемæй иннæ анз ауæхæн куститæ гъæуама æнхæстгонд æрцæуонцæ нæ республики цалдæр культурон-рохсадон косæндонеми.

*  *  *

Уæрæсей адæмти æвзæгтæй олимпиадитæ кæбæл гъæуама цæуонцæ, уони номхигъдмæ хаст æрцудæй нæ маддæлон æвзаг дæр. Е бæргæ æхцæуæн хабар æй, фал бабæй æй нæ хецмæрез чиновникти фудæй ку никкуддæртæ кæнонцæ æма бабæй дигорон æвзаг кæмидæр фæскъумти ку нæ райзайидæ.

*  *  *

Аци анзи фараст мæйей дæргъи тæрхонæнхæстгæнæг пъиристæфтæ ихæстæдаргутæй байстонцæ 3 миллиард сомемæй фулдæр. Уонæй 150 миллион соми байстонцæ, сæ сувæллæнттæ алименттæ федунæй æхе ка тиллеф кодта, еци ниййергутæй, 10 миллион соми ба, сæ косгутæн мизд гъæугæ фæткæмæ гæсгæ ка нæ фиста, еци кустдæтгутæй.

*  *  *

Цæгат Иристони Тæбæхсæути Балой номбæл паддзахадон академион театр «Золотой Витязь», зæгъгæ, Æхсæндуйнеуон театралон форуми хуарзæнхæгонд æрцудæй æртæ дипломемæй. Лæвæрд ба ин æрцудæнцæ номдзуд англисаг драматург Уильям Шекспири пьесæ «Король Лир»-мæ гæсгæ æвæрд спектакли туххæй. Аци уадзимис нæ национ театрæн, зæгъун æнгъезуй, кæд æма кæд иссæй æ хеуон – дæсгай æнзти дæргъи æвдист цудæй е сценæбæл. Æма, æртинсæй анзей фæсте, нури рæстæгутæмæ гæсгæ ’й «бакæсгæй», нæуæгæй исæвардтонцæ театри артистти нæуæг фæлтæр. Æ премьерæ адтæй аци анз феврали.

*  *  *

Национ проект «Æнæнездзий-надæ»-йи фæлгæти Цæгат Иристонæн 2023 анзи дехгонд æрцæудзæнæй 650 миллион соми.