Сæрмагонд æфсæддон операций архайæг тугъдонти бийнонти иуонгтæн ес Ирон театри спектакльтæмæ лæвар бакæсуни равгæ. Æцæг театрмæ фæццæун, ци бон сæ фæндуй, уой туххæй сæ гъæуй рагацау театри къассæмæ рагацау фегъосун кæнун.

*  *  *

Цæгат Иристони скъолатæй æхсæз æма инсæй бундоронæй цалцæггонд æрцæудзæнæнцæ нæуæг анзи. Уогæ ба 2024-2026 æнзти астæуккаг ахургæнæндæнттæ цалцæг кæнуни федералон программи архайуни туххæй нæ республикæ балæвардта еуæндæс æма дууинсæй курдиади.

*  *  *

Куд иннæ æнзти, уотæ Уæрæсей Конституций Бони (12 декабри) нæ республики хецауади Хæдзари нæ бæсти гражданини паспорттæ кадгин уавæри лæвæрд æрцудæй аст æма инсæй кизги æма биццеуемæн. Аци цауи æхцæуæндзийнадæ никки уæлдæр кæнуй е, æма уонæй алкедæр устур æнтæстдзийнæдтæ æвдесуй ахури, исфæлдистадон архайди, спорти, царди гъуддæгути.

*  *  *

Цæгат Иристони арæзт æрцудæй Нартиади Анзи агъазиау мадзæлттæй еу – Æхсæнадæмон фестиваль «Арфæ». Архайдтонцæ си Цæгат-Кавказаг федералон округи регионти, Абхазий, Хонсар Иристони æма Мæскуй минæвæрттæ. Етæ равдистонцæ сæ адæмихæттити исфæлдистадæ зарунæй, кафунæй æма æндæр фольклорон хузтæй. Мадзали кæронбæттæн иссæй агъазиау концерт нæ республики адæмон исфæлдистади Хæдзари.

*  *  *

Дзæуæгигъæуи Ленини фæзи 17 декабри 12 сахаттемæй ба 19 сахаттей уæнгæ арæзт æрцæудзæнæй хуæрзауодæн армукъа «Хуæрзеуæги цетенæ». Аразунцæ ’й къохæй дзаумæуттæ аразунмæ арæхстгинтæ æма фонд «Хуæрзеуæгæн уæн ес!» Армукъай балхæнæн уодзæнæй аллихузон хеконд нæуæганзон гъазæнтæ, сувениртæ, хæдзари гъæугæ дзаумæуттæ…

*  *  *

Литературон-аййевадон журнал «Дарьял» ци конкурс исаразта фантастикон уадзимистæ финсунæй, уой хатдзæгтæмæ гæсгæ си радзурдти номинаций уæлахезон иссæй Кæсæг-Балхъари минæвар Никитæ Лисовой. Номинаци «Миниатюрæ»-йи ба фæууæлахез æй Цæгат Иристони Хетæгкати Къостай номбæл паддзахадон университети фиццаг къурси студенткæ Æгъузарти Элинæ.