Дзæуæгигъæуи бабæй райдæдтонцæ трамвайтæбæл экскурситæ аразун. Фиццаг уæхæн балций рацæуни барæ æрхаудтæй, Лугански сахарæй абони Цæгат Иристони ка цæруй, еци сувæллæнттæмæ. Етæ аци «цæугæ» мадзали фæрци базондзæнæнцæ берæ аллихузон цæмæдесаг хабæрттæ Дзæуæгигъæуи, уæдта Иристони историйæй, сæ абони цардæй. Трамваййи экскурсий рабалци кодтонцæ Дзæуæгигъæуи скъолати дæс æма дууинсæй ахурдзауи. Уæхæн экскурситæ кæстæртæн арæзт цæудзæнæнцæ сауæнгæ сæрди фæстаг бæнтти уæнгæ.

* * *

Уæллагири коми Цъæйи райдæдтонцæ аразун фусунуæтти нæуæг комплекс. Абони уæнгæ бал си цæттæ ’нцæ дæс уати – дууинсæй иуазæгей фагæ.

Цæунцæ административон уæттæ æма ресторан исфæлгонц кæнуни  кæронбæттæни куститæ. Комплекс туристтæн гъæуама æ дуæрттæ байгон кæна майи бæрæгбæнттæмæ.

Нуртæккæ ма куст цæуй «Мамисон», «Къæхтисæр», «Алания-парк», зæгъгæ, еци устур туристон проекттæ исæнхæст кæнунбæл дæр.

* * *

Нæ  республики Сæргълæууæг байхæс кодта нæуæг ахури анзæй фæстæмæ скъолати ка косдзæнæй, еци ахургæнгутæн уæлæнхасæн феддонтæ иснисан кæнун. Дзубанди цæуй аци анз ахургæнæндæнттæ каст ка фæууодзæнæй, еци ахургæнгутæбæл. «Фиццаг анз æригон ахургæнгутæ æнæ разæнгардгæнæг феддонтæй ке косдзæнæнцæ, уой нимайгæй уæлæнхасæн феддонтæ син агъазгæнæг уодзæнæнцæ сæ куст нивæбæл уагæй æнхæст кæнунæн», – загъта нæ республики ахурадæ æма науки министр Алибегти Эллæ.

* * *

Цæгат Иристони косун райдæдта  уалдзигон лагерь «Алайнаг фæранк». Байгон æй кодтонцæ, «Фæлмæн зæрдæ», зæгъгæ, центри бундорбæл. Аци лагермæ æрбахондзæнæнцæ берæсувæллонгин æма агъазгъæуагæ бийнонтæй сабийтæ. Уонæн исараздзæнæнцæ аллихузон фадуæттæ дæр сæ рæстæг зæрдæмæдзæугæй æма пайдайæй рарветунæн.

Лагерь «Алайнаг фæранк»-и фарæ сæ фæллад исуагътонцæ æма се ’нæнездзийнадæ фæффедардæр кодтонцæ 250 сувæллони Дзæуæгигъæу æма нæ республики районтæй.