Дзæуæгигъæуи 29 июлæй 2 августи уæнгæ цæуй  агъазиау культурон мадзал – IV Еугуруæрæсеуон этнофестиваль «Рон-2026». Сæйрагдæр архайд цæуй дууæ бæрæг фæзуатебæл: 29 июлæй 2 августи уæнгæ иуазгутæн ес Цæгат Иристони Национ музейи равдистити зали (Горькийи гъæунгæ, 8-аг хæдзарæ) сæрмагондæй арæзт  равдист-армукъа бабæрæг кæнуни равгæ; æ кæронбæттæни ба, 2 августи Дзæуæгигъæуи Сæребари фæзи æвдист цæудзæнæй устур концертон программæ. Аци цæмæдесаг мадзал арæзт цæуй культурон хъæппæрести Президентон фонди агъазæй. Æ исаразунбæл ба байархайдтонцæ Цæгат Иристони æма Уæрæсей адæмон аййевадон армдæснити æмбалæдтæ æма Дзæуæгигъæуи бунæттон хеунаффæйади администраци.

Этнофестивали сæйраг нисанеуæг æй нæ Фидибæсти адæмти æгъдæуттæ æма исфæлдистади еудзийнадæ федардæр кæнун.  Æма  си архайун ба сæ бон æй нæ бæсти алли регионти адæмон аййевадон армдæснитæн, хузæгæнгутæн, дизайнертæн, брендтæ æма исфæлдистадон студитæн, ансамбльтæ æма музыкалон коллективтæн.

Фестивали рæстæг сæ куститæ æвдесунцæ армдæснитæ Краснодари æма Красноярски крайтæй, Дагестани æма Кæсæг-Балхъари республикитæй, Оренбурги, Иваново æма Саратови облæсттæй, Стъараполæй æма Цæгат Иристонæй.

Иуазгутæ сæхе цæститæй уинунцæ аййевадон геппиуадзуйнадæ, гъæдæрмæги хæццæ куст, æвзестæ æма æндæр æрмæгутæй ювелирон куститæ, фуси царæй æма сæракæй конд дзаумæуттæ, æрдзон дортæй арæзт хæзнатæ æма уотæ идарддæр. Уæлдай парахатдæрæй æвдист цæунцæ цæгатиристойнаг армдæснити куститæ: къохæй конд бæгæний къостæ æма фингитæ, цилле сæрбæттæнтæ, хæдæнттæ, авдæнтæ æма æндæртæ.

Фестивали кæронбæттæн, ку зæгъæн,  рахецæн уодзæнæй 2 августи Дзæуæгигъæуи Сæребари фæзи арæзт устур Гала-концертæй. Бабæрæг æй кæнетæ, уæ зæрдæмæ си ци фæццæуа, уæхæнæй си берæ дессæгтæ уодзæнæй.

Нæ уацхæссæг