20 майя 2024

СÆЙРАГДÆР – АДÆМИ ÆНÆНЕЗДЗИЙНАДÆ

20.05.2023 | 13:54

Хуæнхон гъæути фельдшерон-акушерон пунктти фагæ ес æнæмæнгæ гъæугæ медицинон ефтонггæрзтæ, æнхæст æнцæ медицинон косгутæй дæр. Нуртæккæ куст цæуй уобæл, цæмæй хуæнбæсти фулдæр адæм ци медицинон косæндæнттæмæ хаст цæунцæ, уонæми уа хæсгæ медицинон ефтонггæрзтæ. Уой фæрци ами æнхæстгонд цæудзæнæнцæ, раздæр райцентртæ æма Дзæуæгигъæумæ ке туххæй цæун гъудæй, уæхæн медицинон лæггæдтæ.

* * *

Аци мæйи кæронмæ нæ республики гъæутæй цалдæреми игонгонд æрцæудзæнæнцæ афтектæ – æдегурæй æхсæрдæс. Сæ бæрцæй сæйрагдæр е æй, цæмæй уа, адæми хуастæй ци гъæуй, етæ, уæдта цæмæй сæ хуæрзгъæдæдзийнадæ æнæсеккаг уа.

* * *

Дзæуæгигъæуи клиникæ «Инвитро»-мæ Санкт-Петербурги  клиникитæ «Скандинавия» æма «Скандинавия АВА-ПЕТЕР»-æй æрбацæуæг дохтиртæ-эксперттæ Санкт-Петербурги хуæздæр клиникитæй еуеми лæвар исдзæбæх кæнунæн равзардзæнæнцæ сæйгити.

Дæсни дохтиртæ Юрий Дорофеев, Мария Макулова æма Ольгæ Камышева дзæбæхкæнуйнаг сæйгити æвзардзæнæнцæ мæнæ уæхæн къабæзтæмæ гæсгæ: сувæллæнтти æма гъомбæл адæми травматологи; нейрохирурги; гинекологи; æнхусадон репродуктивон технологитæ.

Дохтиртæ, сæйгæ адæймæгутæн сæ уавæр лæмбунæг рартасгæй, идарддæри дзæбæхкæнуйнади туххæй унаффитæ фегъосун кæндзæнæнцæ. Санкт-Петербурги клиникитæмæ лæвар   дзæбæх кæнунмæ бацæун куд æнгъезуй, нæ республики иуазгутæ уой туххæй дæр иристойнæгтæн хабæрттæ бæлвурдæй фегъосун кæндзæнæнцæ.

Уомæй размæ уæ кæмæ гæсгæ дзæбæх кодтонцæ, уæдта уæ идарддæри дзæбæхкæнуйнади туххæй хатдзæг искæнунæн еугур еци медицинон гæгъæдитæ бацæттæ кæнетæ. Нуриккон косæнгæрзтæй ефтонггонд клиникитæ «Скандинавия» æма «Скандинавия АВА-ПЕТЕР» медицинон лæггæдти базаради косунцæ 20 анземæй фулдæр.

Петербургаг дохтирти хæццæ фембæлунмæ хе ниффинсун, уæдта гъæугæ гæгъæдити номхигъд æма медицинон унаффи аргъ базонун ке бафæндæ уа, уонæн уæхæн фадуат ес телефонæй бадзоргæй, æ номертæ: 7(8672)333-221. Клиникæ «Инвитро»-й адрес: Дзæуæгигъæу, Барбашови гъæунгæ, 64.