Цæгат Кавкази федералон зилди агъазиау проекттæ царди уагъд куд цæунцæ, уой туххæй дзубанди цудæй, Уæрæсей экономикон ирæзти министри хуæдæййевæг Сергей Назаров видеобастдзийнади хузи ци æмбурд исаразта, уоми. Цæгат Иристонæй мадзали архайдтонцæ: Хецауади Сæрдар Дзанайти Барис, гъæууон хæдзаради министр Къусрати Алан æма экономикон ирæзти министри хуæдæййевæг Кокайти Сослан.

Республики экономикон ирæзти хизæги фæлгæти куст цæуй фондз агъаззаг проекттебæл, уони хæццæ – «Агропромышленнон комплекс», «Нæуæг туристон дестинацити (туристти домæнтæн дзуапдæттæг георграфион бунат е ‘рдзон, культурон, историон фæрæзнити хæццæ, æхсæвеуат кæми ‘ркæна, хуæруйнаг ин кæми кæнонцæ, æхе райерхæфсунмæ ин уавæртæ кæми уа æма уотæ идарддæр), «Балер кæсалгæ кустгæнæн хæдзарадæ исаразун», «Аллиафонон туристон-рекреацион комплекс «Мамисон» исаразун», «Транспортон-логистикон комплекс». Уонæн ма ес еуæндæс дæлпроекти.

Дзанайти Бариси загъдмæ гæсгæ, 2030 анзмæ проекттæбæл гъæуама харзгонд æрцæуа 63 миллиард соми, уонæй 52 миллиарди æнцæ æнæбюджетон фæрæзнитæ. Уони фæрци ци арæзт æрцæуа, уомæй нæмæ фæззиндзæнæй æхсæз миней бæрцæ кусти бунæттæ. Абони уæнгæ бал проекттæбæл харзгонд æрцудæй æнæбюджетон фæрæзнитæ 33,7 миллиард соми. Проекттæбæл куст ку райдæдта, уæдæй нурмæ фæззиндтæй еу мин кусти бунатемæ хæстæг.

Зæгъун гъæуй уой, æма нерæнгæ бал арæзт æрцудæй фæткъу бæлæсти рæзæдонæ, исаразтонцæ рæзæ æфснайæн амаддзæгтæ, аэропорт «Владикавказ»-и медæггаг уæлдæфон нæдтæн аэровагзалон комплекс.

Дзанайти Барис куд баханхæ кодта, уотемæй агъаззаг проекттæ царди уадзуни гъуддаги республикæ æнтæстгинæй пайда кæнуй федералон æма регионалон агъази мадзæлттæй.