«Иристони Намус»-и программæ арæзт æрцудæй сæрмагонд æфсæддон операций архайгутæй республики паддзахадон хецаудзийнадæ æма бунæттон хеунаффæйади организацитæ, уæдта æхсæнадон еугæндтæн дæсни разамонгутæ бацæттæ кæнунæн.

Куд ахсгиаг æй фарста, уобæл дзорæг æй, программи Æхсæнадон совети сæргълæууæг, нæ республики разамонæг Сергей Меняйло ке æй, е. Æ хуæдæййевæг – республики Сæргълæууæг æма Хецауади Администраций разамонæг Гобети Ибрагим.

Уой фæдбæл исаразтонцæ Æхсæнадон совет, æ иуонгтæй еу æй Хетæгкати Маринæ – паддзахадон фонд «Защитники Отечества»-йи цæгатиристойнаг хайади разамонæг.

– Республики ци ахурадон программæ бацудæй æ тухи, е ахсгиаг проект æй, ес ин устур ахедундзийнадæ. Нæ регионалон хайади нур дууæ анзи косуй, еци рæстæгмæ хуарз базудтан, сæрмагонд æфсæддон операций архайгутæ æма ветерантæ сæйрагдæр цæмæй тухсунцæ, уони, се ’хсæн – куст агорун æма дæснийадæ баййевуни фæдбæл ахурти фарстатæ. Уомæ гæсгæ, программи архайун сæрмагонд æфсæддон операций архайгутæн хуарз фадуат дæттуй бæзгæ куст иссерунæн æма сæ зонундзийнæдтæ фæуурухдæр кæнунæн. Программæ æ тухи ку бацудæй, уæдæй фæстæмæ сæрмагонд æфсæддон операций архайгутæ æма ветерантæ агъаз истонцæ нæ фонди специалисттæй. Æ архайгутæн фадуæттæ искодтонцæ техникон агъаз есунæн, регистраци искæнунæн. Уомæй син сæрмагондæй радех кодтонцæ, компьютертæбæл интернетмæ бахезунæн кæми адтæй фадуат, уæхæн азгъунст, – зæгъуй фонди регионалон хайади сæргълæууæг.

Сæрмагонд æфсæддон операций ветерантæ æма архайгутæй курдиæттæ балæвардтонцæ 385 адæймаги. Хетæгкати Марини гъудимæ гæсгæ, ес нифс федæни сæ алкæмæн дæр æ бон ке бауодзæнæй царди æ бунат иссерун. Программи сæйраг ихæс æй дæсни специалисттæ бацæттæ кæнун, гъуддагзонæг разамонгутæн паддзахадон хецаудзийнадæ æма бунæттон хеунаффæйади оргæнти кустæн урух зонундзийнæдтæ раттун, уæдта республики организацитæ æма æхсæнадон еугæндтæн разамонгутæ бацæттæ кæнун.

Нæ рæстæги Фидибæстæ гъæуайгæнгутæй рауайдзæнæй нæуæг дæсни кадртæ æма разамонгутæ, бунæтти косгæй син нæуæг фæлтæртæ гъомбæл кæнун æма нæ паддзахади нæуæг истори финсунæн уодзæнæй хуарз фадуат.