Æрæги Республикæ Цæгат Иристон-Аланий Хецауади Сæрдари хуæдæййевæг Плати Альбинæн сахар Пятигорски адтæй пресс-конференци регионалон информацион центр «ТАСС Кавказ»-и. Цæгат Иристони Хецауади бæрнон косæг журналисттæн радзурдта, региони социалон политики уагæвæрдтæ куд æнхæстгонд цæунцæ, уой туххæй.

Фембæлди рæстæг æргом раздахтонцæ берæ ахсгиаг фарстатæмæ: æнæнездзийнадæ гъæуайкæнуйнади, ахуради, культури косæндæнтти цалцæг æма арæзтадæ, медицинæ æма иннæ къабæзти косгути кадавар, ирæзгæ фæлтæри профориентаци, ахурадон киунугутæ æма уотæ идарддæр.

Плати Альбинæ куд фæббæрæг кодта, уотемæй æнæнездзийнадæ гъæуайкæнуйнади къабази дæр кадрти фарстай хæццæ ес тухстдзийнæдтæ. Æ дзубандимæ гæсгæ, гъæугæ специалистти кадавар уæлдай хъæбæрдæр зиннуй идæрддзæф æма хуæнхаг цæрæн бунæтти уавæрбæл. Хецауади Сæрдари хуæдæййевæг куд загъта, уотемæй фарста ралух кæнунбæл арæзт цæуй бæлвурд мадзæлттæ.

Сувæллæнтти сæрдигон фæлладуагъди кампанибæл дзоргæй, Плати Альбинæ фегъосун кодта бæлвурд нимæдзтæ. Уотæ сæрдигон фæлладуагъд æма æнæнездзийнадæ фæффедардæр кæнуни мадзæлттæ рахъæртдзæнæнцæ 36 мин сувæллонебæл. Скъоладзаутæ æма иннæ æнагъонтæ сæ фæллад кæми æма куд уадздзæнæнцæ, уобæл нуртæккæ косунцæ профилон республикон ведомствитæ.

Фæстаг рæстæг берæ дзубанди цæуй Иристони историй туххæй нæуæг ахурадон пособитæ бацæттæ кæнунбæл. Хецауади Сæрдари хуæдæййевæги дзубандимæ гæсгæ, нуртæккæ кæронмæ фæххæстæг кæнуй Иристони историй нæуæг киунугæ. Куд нисангонд цæуй, уотемæй нæуæг ахури анзи райдайæнмæ киунугæ гъæуама мухури рацæуа. Уæхæн фæткæбæл куст цæуй æндæр ахурадон литературæбæл дæр.

Пресс-конференций архайгутæ се ’ргом раздахтонцæ Уæлахези 80 анзей кадæн мадзæлттæмæ дæр. Плати Альбини дзубандимæ гæсгæ, Цæгат Иристон ахедгæ мадзæлттæ цæттæ кæнуй Уæлахези бæрæгбонмæ. Уони ’хсæн: æфсæддон парад Дзæуæгигъæуи, фембæлдтитæ Устур Фидибæстон тугъди æма фæскъилдуни фæллойнæгæнгути хæццæ, патриотон акцитæ «Æнæмæлгæ полк», «Георгий лентæ» æма «Сæ цæсгæнттæмæ син бакæсæ», историон-рохситауæн конференцитæ, равдиститæ…

Дзиллон информаций фæрæзнити минæвæрттæ цæмæдесдзийнадæ равдистонцæ республики культурон цардмæ дæр. Культури къабази ахсгиагдæр цаутæбæл дзоргæй, Плати Альбинæ куд бафеппайдта, уотемæй Иристон æхе цæттæ кæнуй дуккаг дуйнеуон театралон фестиваль «Вахтангов. Фидиуæзæгмæ фæндагбæл»-мæ. Еци агъазиау аййевадон мадзал уодзæнæй сæрди, æ архайгутæ уодзæнæнцæ Мæску æма æндæр уæрæсейаг регионти зундгонддæр театртæ…

Фембæлди рæстæг бунат адтæй берæ æндæр фарстатæн дæр. Цæгат Иристони Хецауади Сæрдари хуæдæййевæг байархайдта сæ еугуремæн дæр лæмбунæг æма еугурвæрсуг дзуæппитæ раттунбæл.