Арфæ кæнуй Сергей МЕНЯЙЛО.

Ахури нæуæг анз Цæгат Иристони скъолатæй цуппæрдæсеми райдæдта, бундоронæй цалцæггонд æрцудæнцæ, уотемæй. Уонæй еу иссæй Дур-Дури дуккаг скъола. Нæуæггондæй æ дуæрттæ ке байгон кодта, е айдагъ скъолай ахурдзаутæ æма сæ ахургæнгутæн нæ, фал æнæгъæнæ гъæубæстæн дæр иссæй æцæг  бæрæгбон, æма син сæ цийнæбæл батабедзæ кæнунмæ сæрмагондæй æрцудæй нæ республики Сæргълæууæг Сергей Меняйло дæр.

Скъолай нæуæггонд æрцудæнцæ къæбинеттæ, хуæрæндонæ, фæззиндтæй си нуриккон спортивон зал, спортæй архайуни фæзæ. Сабитæн сæ бон уодзæнæй гуманитарон æма агротехникон зонундзийнæдтæ есун, ес си Æнæнгъæлæги уавæрти министради кадетон кълас дæр.

Æрбацæуæг ниййергутæ, ахургæнгутæ фæууидтонцæ, сувæллæнттæ куд лæмбунæг кæсунцæ скъолай ци нæуæгдзийнæдтæ фæззиндтæнцæ æма кæрæдземæн сæ куд амонунцæ, уони. Бæрæг адтæй, алцидæр уони аккаг конд ке ’рцудæй, е. Сергей Меняйло куд фæббæрæг кодта, уотемæй гъæуама алли сувæллон дæр лæдæра, ахурæн ин еугур гæнæнтæ æма уавæртæ ке ес, уой. Уæд сæ бон уодзæнæй сæ арæхстдзийнадæ, сæ гæнæнтæ равдесун æма сæ размæ æвæрд нисантæмæ тундзун.

Дур-Дури дуккаг скъолай ахурдзаутæ.