ЦÆЛЛАГТИ Виктори конд хузæ «Адæми арфæ».

Сæрмагонд тугъдон операцимæ гæсгæ хайон фæдздзурдæй Уæрæсей Гæрзефтонг Тухти рæнгъитæмæ ке байагурдтонцæ, еци æфсæддонти еума къуар бабæй æрæги Дзæуæгигъæуæй ранæхстæр æнцæ сæ хъазауатон балций.

Уони рафæндараст кæнуни æма син нифсдæттæн арфитæ ракæнуни фæдбæл арæзт сæрмагонд мадзали архайдтонцæ нæ республики Сæргълæууæг Сергей Меняйло, Парламенти Сæрдар Тускъати Таймораз, æфсæддон комиссаради минæвæрттæ, республики æхсæнадæ, дини косгутæ, седтонтæн сæ хæстæгутæ.

Æмбурди радзубанди кæнгæй Сергей Меняйло загъта:

– Фæндараст кæнетæ, биццеутæ! Сумах куд æцæг лæгтæ, уотæ уæхемæ райстайтæ, нæ фидтæлтæй нин ци æнæмæнгæ райаразуйнаг гъуддæгутæ байзадæй, уони кæрæй-кæронмæ рахъæртун кæнуни ихæс. Æма ми федарæй æруагæс кæнуй, æнтæстгинæй æй ке исæнхæст кæндзинайтæ, е. Уомæй хъæбæрдæр ба уин мæ зæрдæ зæгъуй, цæмæй дзæбæхæй уæ хæдзæрттæмæ исæздæхайтæ уæлахези хæццæ æма сæрæгасæй. Сумах айтæ Уæрæсей æма Иристони сæрустурдзийнадæ.

Уæлдай зæрдибун зæгъуйнæгтæ ба республики Сæргълæууæг загъта æфсæддонти хеуæнттæн.

– Нæ биццеутæ цæунцæ се ’фсæддон ихæс æнхæст кæнунмæ. Райгурæн бæстæ сæмæ фæдздзурдта æма æнæдузæрдугæй, нифсгунæй аразий дзуапп равардтонцæ. Хъазар хæстæгутæ æма æмбæлттæ!

Лæдæрун уин уæ уавæр, фал уæддæр уæмæ разиннæд хъаурæ не ’фсæддонти зæрдхъурмæй нæ, фал сæ игъæлдзæгæй рафæндараст кæнунæн. Е син агъазиау уодæнцойнæ уодзæнæй.

Нуртæккæ æфсæддон операций ци нæлгоймæгтæ архайуй, уонæн нифситæ æвæрун гъæуй, сæрустур си ке ан, уой гъæуама зононцæ.

Нур цалдæр мæйи служби ка ’й Донбасси, еци æмзæнхонтæй сæрустур ан, зæрдиагæй син зæгъæн, боз си ке ан, уой. Зин уавæрти нацистти хæццæ нур аст мæйи тох кæнуй къуар «Аланистон». Æртæ мæйи – къуар «Иристон». Хумæтæг уавæрти нæ ’нцæ, фал сæ размæ æвæрд ихæстæ, æнæмæнгæ, исæнхæст кæнун нæ бон бауодзæнæй.

Мæ зæрдæ дзоруй алкæмæ дæр, сæ еугуремæ дæр. Алке бæдолæ дæр мæнæн хъазар æй.

Гъе уотемæй, нифсдæттæн æма разæнгардгæнæн фæдзæхстити хæццæ рафæндараст кодтонцæ Иристони дзиллæ сæ тугъдонти сæрмагонд тугъдон операций Уæрæсей æдасдзийнади сæрбæлтау тохмæ…