Аци бæнтти Лескен – нæ Иристони цитгиндæр гъæутæй еу – бæрæг кæнуй æ равзурди астинсæй анзи. Уой фæдбæл зæрдиагæй арфæ кæнæн гъæубæстæн – абони си ка цæруй, уæдта, гъæуккæгтæй нур æндæр рауæнти ка цæруй, уонæн дæр. Нæ арфитæй ба æнцæ, мæнæ нæ газети абони рауагъди ци æрмæгутæ мухур кæнæн, етæ дæр.

Фиццаг фарсбæл рæзæбæласи къарæ сæрмагонд нисанеуæги хузи мухур кæнæн. Еуемæй, Лескен алкæддæр Иристони нимад цудæй тæккæ рæзбундæр гъæутæй еуебæл. Советон хецаудзийнади фиццаг æнзти алæмæти искурдиадæгин рæзикустгæнæг Хидирти Батæрбеги хъæппæреси æма е ’мкустгæнгути фæллойни фæрци ами фæззиндтæй рæзбунтæ – сæ фæзуат адтæй æртæсæдæ гектаремæй фулдæр. Ци аллихузон рæзи тиллæг си æрæмбурд кæниуонцæ, уомæй хайгин уиуонцæ нæ республики æма уомæй еуварсдæр рауæнти цæрæг дзиллæ дæр.

Иннемæй ба, рæзæбæласи къарæмæ гæсгæ ма уой зæгъуйнаг дæн, æма Лескен «тиллæггун» адтæй, æхсæнадæн берæ гъæугæ гъуддæгути ка фескъуæлхтæй æма абони дæр ка ’скъуæлхуй, уæхæн адæймæгутæй.

Етæ ’нцæ адæмон хæдзаради еугур къабæзти архайæг дæсни специалисттæ, æнтæстгинæй фæллойнæ кодтонцæ æма кæнунцæ айдагъ сæ райгурæн гъæуи æма Иристони нæ, фал сауæнгæ нæ Фидибæсти берæ æндæр рауæнти дæр. Махмæ гæсгæ, нæ газеткæсгутæ дæр сæ зондзæнæнцæ, берети туххæй си æрмæгутæ мухургонд цудæй нæ газети дæр, уомæ гæсгæ ба уони туххæй кæрæй-кæронмæ абони нæ дзордзинан. Багъæуаги ба син сæ кой æнæмæнгæ ракæндзинан.

Мæнæ рæзæбæласи фæйнæфарсеми ци дууæ къари ниввардтан, етæ ба уой æвдесæн æнцæ, æма Лескенæн æ æзинибон дæр намусгин æй арфиаг гъуддæгутæй, мадта æ исонибон ба никки зæрдæмæдзæугæдæр уодзæнæй, нур си ци кæстæр фæлтæртæ ирæзуй, уони лæгдзийнæдтæй.

Еци еугур хабæрттæмæ гæсгæ ба нæ бон æй Лескени туххæй федарæй уотæ зæгъун: «Æй гъæубæстæ намус æма амонди рæзбун!..»