ЦАГЪАТИ Сослан (астæуæй) боз æй аразгути кустæй.

Адæми цардиуаги уавæртæ хузæнондæр кæнунæн Дигори райони политикон парти «Еугонд Уæрæсе»-й хъæппæресæй нисангонд мадзæлттæ куд æхæстгонд цæунцæ, уомæ райони разамунди ’рдигæй еудадзугон лæмбунæг цæстадард ес.

Мæнæ æрæги бабæй райони разамонæг, партиий бунæттон хайади сектерарь Цагъати Сослан, æ хæццæ ма партий политикон совети иуонгтæ Гулати Ремæ æма Къорнати Тамерлан (райони газет «Дигори хабæрттæ»-йи сæйраг редактор), фиццаградон организаций нимæрдар Касати Эльзæ æма æхсæнадон палати минæвар Вероникæ Пахомова, уотемæй æркастæнцæ, бæрзонд социалон ахедундзийнадæ кæмæн ес, еци нæуæг арæзтæдтæ æма бундоронæй цалцæгкæнуйнаг азгъунстити куститæ куд цæунцæ, уомæ.

Уавæр бæрæггæнгутæ устур аргъ искодтонцæ, Уорсдони гъæуи астæуккаг скъолабæл капиталон æгъдауæй куститæ тагъд æма бæрзонд уæлвæзадæбæл ке цæунцæ, уомæн.

Хъармани гъæууон скъолай цалцæггæнæн куститæ нерæнгæ нур райдæдтонцæ. Нуртæккæ бал косгутæ æййевунцæ бæстихаййи сæр æма къæрæзгити рамитæ. Дууæ объектеми дæр цалцæггæнæн куститæ ’нхæст кæнуй арæзтадон æхсæнадæ «Кайзер».

Дур-Дури ба фæуунтæбæл æнцæ нæуæг спортивон зали арæзтадон куститæ. Сæ тæккæ тæмæни ’нцæ инженерон коммуникацитæ æма пъолтæ æййевуни куститæ, сæрмагонд æрмæгæй си гæрæнтæ дæр аразунцæ. Уой хæццæ ба ма æвæрунцæ автономон кæдзосгæнæн амаддзаг. Скъолай фæзуат дæр нивæбæл фæлгонцгонд æрцæудзæнæй. Аци спортзали уодзæнæй уæгъдебарæ гъæбесæйхуæцгути æма аллихузи спортивон фæрæзнитæй архайуни залтæ, физикон æгъдауæй æ гæнæнтæ цубур кæмæн æнцæ, еци граждæнти къуарæн дæр си ес аллихузи уодæнцойнæ уавæртæ. Æнхæстæй си цалцæггæнæн куститæ фæууодзæнæнцæ июни мæйи райдайæни. Дзуапп ибæл дæттуй кустуат «Лана», æ сæргълæууæг Æгъузарти Зурапп.

Мадта Дур-Дури 2-аг астæуккаг скъола дæр цубур рæстæгмæ исуодзæнæй гъæуи федауцæ. Ами фæуунтæбæл æнцæ бундоронæй цалцæггæнæн куститæ. Æнхæст ба сæ кæнуй кустуат «Лана». Скъолай хузæн федауцæ ’й, æрæги ци нæуæг, æхсæзинсæй бунати кæми ес, сабийти еци рæвдауæндонæ дæр, рæсугъд гъазæн фæзи хæццæ.

Партион къуари зæрдитæ барохс æнцæ сахар Дигорай рæвдауæндонæ «Улыбка»-йи ци цалцæггæнæн куститæ æнхæстгонд цæунцæ, уонæй дæр. Аци азгъунсти æнхæстæй æййивд æрцæудзæнæнцæ еугур инженерон коммуникацитæ, бæстихаййи сæр, къæрæзгитæ, дуæрттæ, пъолтæ, фæрстæ æма санитарон техникæ дæр.

Дигори райони сæргълæууæг Цагъати Сослан устур аргъ искодта, «Еумæйаг Уæрæсе»-й программи фæлгæти цалцæггонд, уæдта нæуæгæй арæзт ка ’рцудæй, еци бæстихæйтти уавæрæн. Аци азгъунститæ æмгъуд рæстæгмæ гæсгæ лæвæрд ку ’рцæуонцæ, уæд е уодзæнæй агъазиау ампъез Дигори райони изолдæри райрæзти, цæргути царди уавæртæ фæххæуæздæр кæнуни гъуддаги – е æй партий сæйрагдæр нисан.

Цагъати Сослан ма сæрмагондæй баханхæ кодта уой дæр, æма райони разамунд зæрдиагæй арфæ кæнуй Цæгат Иристони Сæргълæууæг Сергей Меняйлойæн, Дигори районмæ æ еудадзугон лæмбунæг цæстдарди, уæдта федералон æма регионалон программитæ сæ райони царди рауадзуни гъуддаги агъаз кæнуни туххæй.