28 майя 2022

БЕСЛÆНИ ИСАРАЗДЗÆНÆНЦÆ НОМЕРÆН КУЛЬТУРОН-ПАТРИОТОН ЦЕНТР

04.09.2021 | 12:05

Беслæни фиццаг скъолай арæзт террористон фудракæнди ка бабун æй, еци æвуд адæми номерæн культурон-патриотон Центри арæзтадæн дехгонд æрцæудзæнæй фæрæзнитæ гъæугæ бæрцæй. Уой фæдбæл сæрмагонд унаффæ бафиста премьер-министр Михаил Мишустин.

Куд нисангонд цæуй, уотемæй уæлдæр амунд Центр арæзт æрцæудзæнæй, гæрзефтонг фудгæнутæ 2004 анзи 1 сентябри ци скъола байахæстонцæ, уой бундорбæл. Скъолай азгъунсти райарæзти проектмæ гæсгæ, реставратортæ æма аразгутæ байархайдзæнæнцæ еци æбуалгъ бæнтти æвдесæнтæ багъæуай кæнунбæл. Специалисттæ куд зæгъунцæ, уотемæй спортивон зал æма иннæ бæстихæйттæн исараздзæнæнцæ консерваци, цæмæй идарддæр ма ихæлонцæ. Центри бæстихæйтти райвæрдзæнæнцæ еци цаутæбæл дзорæг экспозицитæ. Уой хæццæ, сæрмагонд зали устур экранбæл æвдист цæудзæнæнцæ  2004 анзи сентябри документалон кинонивтæ. Центри сконди уодзæнæй æндæр номерæн дæлхайæдтæ дæр.

Уæрæсей Хецауади пресс-центри минæвар куд фегъосун кодта, уотемæй аци фæрæзнитæй 2021 анзи кæронмæ центри проектæн исæнхæст кæндзæнæнцæ  æ кустити æртиккаг хаййи бæрцæ. Æнæгъæнæй ба сæ гъæуама фæууонцæ 2022 анзи кæронмæ.

Куд зонæн, уотемæй Беслæни культурон-патриотон номерæн Центри арæзтади фæдбæл Цæгат Иристони Сæргълæууæги ихæстæ рæстæгмæ æнхæстгæнæг Сергей Меняйло дзубанди кодта Уæрæсей Федераций Сæрдар Михаил Мишустини хæццæ, 15 июни син сахар Пятигорски ци косæг фембæлд адтæй, уоми. Уæд премьер-министр зæрдæ байвардта, еци Центри арæзтадæн гъæугæ фæрæзнитæ ке радех кæндзæнæнцæ, уомæй.

Аци ахсгиаг гъуддаг æвæстеуатæй аразуйнаг  ке æй, е лæдæрд æй æма ибæл æнæдзебæлæй архайд цæуй. Зæгъæн, æрæги Цæгат Иристонмæ косæг балций иссудæй реставраторти Цæдеси президент Вячеслав Фатин æма реставрацион компани «СКИФОС-РСК» Петр Павлов. Нæ республики разамонæг Сергей Меняйлой хæццæ фембæлди рæстæг æрдзубанди кодтонцæ еци Центри  райарæзти хæццæ баст фарстатæбæл. Вячеслав Фатин куд загъта, уотемæй реставраций проектмæ гæсгæ гъæуайгонд æрцæудзæнæнцæ, скъолай азгъунстæй ма ци хæйттæ байзадæй, етæ, уой хæццæ ба ма мемориалон – историон центр исаразунæн багъæудзæнæй ци хæйттæ си бабун æнцæ, уони иснæуæг кæнун. Фиццаг скъолай азгъунст исреставраци кæнунæй уæлдай ма нисангонд цæуй, нæуæг музейи агъазгæнæг азгъунст исаразун. Еци еугур куститæн багъæудзæнæй 220 миллион соми. Æнхæстгонд ба гъæуама æрцæуонцæ 2023 анзи кæронмæ.

Зæгъун ма гъæуй уой дæр, æма Михаил Мишустин æрæги бафинста никкидæр ма еу унаффæ, Беслæни идарддæри социалон-экономикон райрæзти фæдбæл. Бæлвурдæй – сахари нæдтæ бацалцæг кæнуни туххæй дехгонд  æрцæудзæнæй 75 миллион сомей бæрцæ. Еци фæрæзнити фæрци райараздзæнæнцæ Ленини, Широкая æма Кооперативон гъæунгтæ. Цалцæги программæмæ ке бахастонцæ, еци гъæунгти еумæйаг дæргъцæ ‘й 2,2 километри. Фæлгонцадон куститæ еугурæй дæр гъæуама æнхæстгонд æрцæуонцæ аци анзи кæронмæ.