Аци анзи райдайæнæй нурмæ Цæгат Иристони нæдтæбæл ци 266 фæндагон-транспортон бæлахи æрцудæй, уонæми гъигæдард баййафтонцæ 427 адæймаги.

Ауæхæн фидбилизтæн сæ зингæ хай æрцæунцæ, нæдтæн сæ кæцидæртæ æдасæй цæуни домæнти аккаг ке нæ ’нцæ, уой фудæй. Е хъæбæр сагъæссаг фарста æй, уомæ гæсгæ ба, уавæр исхузæнон  кæнуни туххæй æнæмæнгæ гъæуама æнхæстгонд æрцæуонцæ гъæугæ мадзæлттæ.

Æма уой фæдбæл нуртæккæ куст цæуй. Зæгъæн, аци анзи дæргъи нæдти фонди фæрæзнити харзæй æнхæстгонд æрцæудзæнæнцæ 4,671 миллиард сомей аргъ куститæ (аци æхцай фæрæзнитæй 2,977 миллиарди æнцæ республикон бюджетæй, 1,694 миллиард соми ба радех кæндзæнæнцæ федералон бюджетæй).

Амунд æхцай фæрæзнити харзæй арæзт æма бундоронæй цалцæггонд æрцæудзæнæнцæ регионалон нисанеуæги автомобилон нæдтæ æма хедтæ. Уомæй уæлдай, автопавильонти хæццæ автобусти æрлæууæн бунæттæ æма нади сæрти бацæуæнтæ аййевгонд æрцæудзæнæнцæ, надгæрæнтти æмбондтæ бафедар кæндзæнæнцæ, цæгиндзитæбæл рохсдæттæн цирæгътæ фæззиндзæнæнцæ, рохси нисантæ бахузæнон кæндзæнæнцæ, транспортон фæрæзнити уæзæмæ цæстдарди бунат исараздзæнæнцæ, уæдта 20 видеокамеритæ исæвæрдзæнæнцæ.