25 майя 2022

ДÆ ЦЪУХБÆЛ КУ НÆ ХУÆЦАЙ!..

30.12.2021 | 12:36

Гъæдгæрони нæуæг цардарæзти дзамани еу бонгин бийнонти фæсевæд нæуæг цардарæзтбæл ниххуæстæнцæ, фæскомцæдесмæ бацудæнцæ æма сæмæ ходуйнаг кастæй, сæ фидæ æ мулк, æ сугъзæринттæ ке римахста, е. Бадеголæ имæ кæнун кодтонцæ, фал имæ сугъзæрийнæ не ’ссирдтонцæ.

Уæд фидæмæ гъæуи нæуæг разамунд фæдздзурдта æма имæ сæхе бахадтонцæ:

– Дæ цæуæти хатир дин кæнæн æма ди сабурæй корæн, дæ сугъзæринттæ кæми баримахстай, уой нин исгъæр кæнæ.

– Цæй сугъзæрийнæ мæмæ ес? Ка уин загъта?! – мæстгунæй дзоруй фидæ.

– Ка нин загъта? Дæ фæскомцæдесон фурттæ, æндæр ка?

– Æрбакæнетæ сæ.

Æрбакодтонцæ сæ. Æрлæудтæнцæ æ рази:

– Баба, цæмæн дæ гъæунцæ? Радтæ сæ. Паддзах исмæгур æй… æма, – лигъстæ ин кæнунцæ фурттæ.

Фидæ сæмæ лæмбунæг фегъуста, мæ фурттæ æрра иссæнцæ, зæгъгæ, уæдта рамæстгун æй æма фудæнæн уотæ бакодта:

– Æз дæр сумахæн рæбунтæ кодтон, æма уæ кæд нæ гъæунцæ, уæд мæн дæр нецæмæн гъæунцæ. Кæд уотæ  ‘й, уæд сумах ке нæ зонетæ, уæхæнттæ дæр ма мæмæ хецæнæй тугури гъæди буни римæхст ес æма уони дæр рахæссетæ!

Махбæл, нæ бæсти дзиллæбæл дæр еци лæхъуæнти цау æрцудæй евгъуд æноси 90-аг æнзти. Уæди рæстæги нæмæ «нæуæг цардиуагæ» аразгути хузи, паддзахади еугур гъуддæгутæ сæхердигæй ка фæккодта, еци амменæгæнгути фæливд зæрдæвæрдтитæбæл раууæндгæй син сæ барæ бакодтан, нæ фидтæлтæ нин ци тухгин Советон Цæдес исаразтонцæ, уой хуарздзийнæдтæ æнæгъæнæй дæр. Æма ци? Еци ибилистæ, еугурадæмон мулкитæбæл фæххæлæф кæнгæй, бонгинæй-бонгиндæр царди равгитæ искодтонцæ сæхецæн дæр æма сæ цæуæти цалдæр фæлтæремæн.  Мæгур адæм ба æнæ нецæмæй райзадæнцæ, сæ царди хабæрттæн тухамæлттæ кæнунцæ.

 

Кирилл КАБАНОВ, коррупций нихмæ Национ комитети сæргълæууæг: «Коррупцийæн æнæгъæнæй искунæг кæнæн нæййес, еунæг бæсти дæр е нæ бантæстæй…»

 

Кæд уотæ ’й, æма коррупци бустæги искунæг кæнунæн мадзал нæййес, уæд ма си еци Комитет ба ескæми гъæуй. Куд фæззæгъунцæ, кадæр хæрæг уотид уасунæн дардта?..

Янæ ЛАНТРАТОВА, Паддзахадон Думи депутат – фæсарæйнæгтæн уруссаг æвзаг ахур кæнуни киунугути медеси туххæй: «Фудгæнгути фæндуй парламентарийтæ исун, психоаналитиктæ-террористтæ, уотемæй ба еудадзуг ниуазунцæ водкæ æма комидзаг кæнунцæ тæккæ æвзаргæдæр хуæруйнæгтæй…»

Нур аци депутат æ алфамбулай ку ракæститæ кæнидæ, æма абони нæмæ æцæгæй кегъæреуæггæнæг ка ’й, уой фæууингæй си баруагæс уодзæнæй, киунугути медес царди æцæгдзийнадæй ке игуруй, е.

 

Маринæ АХМЕДОВА, Уæрæсей адæймаги барти фæдбæл Совети иуонг: «Æнæхæдзарæ ка ’й, уони дæр фæндуй прививкæ искæнун, уомæн æма син е равгæ дæттуй сæхе æхсæнади æнхæстбаргин иуонгтæбæл банимайун…»

Махмæ ба уотæ кæсуй, цума æхсæнади æнхæстбаргин иуонгтæбæл банимайуни разæй дæр сæ гъæуй хе цæрæнуат…