Номдзуд музыкант, дирижер, композитор æма ахургæнæг Гæздæнти Гаппой фурт Булат 29 июли 2024 æ цардæй рахецæн æй.

Уæрæсе æма Цæгат Иристони адæмон артист, Хетæгкати Къостай номбæл æма «Нарти фæткъу»-й премити лауреат, Иристони Фæллойни Бæгъатæр Гæздæнти Булат райгурдæй 1936 анзи 22 июни Цæгат Иристони Ольгинскийи гъæуи. Æ цардуалдзæги банкъардта музыкалон аййевадæмæ цæмæдесдзийнадæ, æма æ идарддæри цардвæндаг уæдæй фæстæмæ баст адтæй музыки хæццæ. Астæуккаг скъола каст ку фæцæй, уæд 1952 анзи бацудæй Дзæуæгигъæуи музыкалон училищемæ, ами еци-еу рæстæг равзурста цалдæр æздæхти: дирижери дæсниадæ, домрæ æма гобойæй цæгъдун исахур кæнун. 1957 анзи æ ахур райдарддæр кодта Гнесинти номбæл Паддзахадон музыкалон-педагогон институти.

Гæздæнти Булат исфæлдистадон надбæл фиццаг къахдзæфтæ ракодта 1950-аг æнзти. Уæд, куд еугур Уæрæсей, уотæ Иристони дæр, культурон æма музыкалон цард ирæзтæй. Булат хъæбæр разæнгардæй архайдта республики культурон царди: финста музыкæ Ирон театри спектакльтæн, еци-еу рæстæг куста Цæгат Иристони Радиокомитети оркестри. Æ аййевадæн ин устур аргъ кодтонцæ айдагъ Иристони нæ, фал Цæгат Кавказ æма Уæрæсей.

Гæздæнти Булат адтæй хъæбæр дæсни фæндурдзæгъдæг æма искурдиадæгин композитор. Е ’гæрон алæмæти аййевадæ хъæбæр хæстæг райстонцæ сæ зæрдæмæ еугур дуйней музыкæуарзгутæ, æ дессаги искурдиади фæрци дзæвгарæ фæгъгъæздугдæр кодта ирон музыкалон хæзнадонæ. Ахургонд, берæзонагæ адæймаг, Булат дæргъвæтийнæ рæстæг æхуæдæг цагъта ирон фæндурæй, адтæй концертмейстер, хъæбæр берæ ин бантæстæй музыкалон аййевади – ниффинста берæ зæрдæмæгъаргæ уадзимистæ. Уомæй уæлдай ма, æнтæстгинæй кодта наукон-зонадон æма педагогон куст дæр.

Уæлдай ахедгæдæр æй æ байвæрæн ахурадæмæ. Маэстро исаразта, ирон музыкалон культурæ багъæуай кæнунæн устур агъаз ка фæцæй, уæхæн ахургæнæн киунугутæ: «Ирон фæндурæй цæгъдуни скъола музыкалон скъолати 1-2 кълæстæн», «Ирон фæндурæй цæгъдуни скъола музыкалон скъолати 3-5 кълæстæн», «Ирон фæндурæн пьесити æмбурдгонд».

Гæздæнти Булат берæ рæстæг адтæй, 2018 анзи ин æ ном кæмæн равардтонцæ, Адæмон инструментти еци национ паддзахадон оркестри аййевадон разамонæг æма дирижер.

Гæздæнти Гаппой фурт Булат æ дессаги агъазиау искурдиади фæрци ниууагъта ирд фæд ирон культури, национ музыки бунтæ багъæуай кæнун æма сæ райрæзуни гъуддаги. Æ дессаги алæмæти искурдиади фæрци æ ном игъустгонд æй еугур Уæрæсей дæр.

Разагъди æвæллайгæ фæллойнæгæнæг æма устур патриот Гæздæнти Гаппой фурт Булати ном æносмæ цæрдзæнæй Иристони цæргути зæрдити.

Сергей МЕНЯЙЛО, Республикæ Цæгат Иристон-Аланий Сæргълæууæг,

ТУСКЪАТИ Таймораз, Республикæ Цæгат Иристон-Аланий Парламенти Сæрдар,

ДЗАНАЙТИ Барис, Республикæ Цæгат Иристон-Аланий Хецауади Сæрдар.