Нæ бæсти Президент Владимир Путин æрæги куд фегъосун кодта, уотемæй 2025 анз Уæрæсей нимад цæудзæнæй нæ Цитгин Уæлахези Анзбæл.

Еци хабарбæл нæ дзиллæ исæмбалдæнцæ хъæбæр аразийæй. Е хумæтæги нæй – нæ Фидибæсти анзфинстити ахсгиаг цаутæн сæ тæккæ агъазиаудæртæй еу æй нæ Цитгин Уæлахез, зæгъгæ, ку зæгъæн, уæд уомæй баууæндетæ, раст уодзинан. Уæдта ма зæгъун гъæуй уой дæр, æма айдагъ нæхе бæсти нæ, фал ма сауæнгæ фæсарæйнаг паддзахæдти дæр рæстуод дзиллитæ кадгинæй æй бæрæг кæнунцæ. Уомæн æма, лæдæрун ке фæндуй, етæ ’й лæдæрунцæ: Советон Цæдеси Уæлахези фæрци æнæгъæнæ дуйне дæр фæййервазтæй фашизми цагъардзийнадæй.

Нæ Цитгин Уæлахези 80 анзей кадæн мах нæ газети еудадзуг дæр мухур кæнуйнаг ан  аллихузон тугъдон æрмæгутæ, уæлдайдæр ба не ’хсаргин тугъдонти туххæй. Уадзæ æма, еци Уæлахез ке хъазауати фæрци бантæстæй, уони рохс нæмттæ кæрæй-кæронмæ дæр зундгонд уонцæ, уадзæ æма фæлтæрæй-фæлтæрмæ нæ адæми æскъуæлхтдзийнади кади цитгиндзийнадæ ма нидæн кæна.

Нæ газети абони номери 4-5-аг фæрстæбæл мухур кæнæн Белоруссий зæнхæбæл партизанон æзмæлди зингæ архайæг, сахартæ Мински æма Дзæуæгигъæуи кадгин гражданин Хæтæгти Александри фурт Харитони туххæй.