Æзинæ, 26 июли Франций сæйраг сахари байгон æнцæ сæрдигон XXXIII Олимпиаг гъæзтитæ. Раздæри рæстæгути уæхæн цау дуйней еугур дзиллитæн дæр исуидæ цийнагæй-цийнагдæр бæрæгбон, кæций райдзастдзийнадæ нæ нидæн кæнидæ, цалинмæ еци еристæ цæуиуонцæ, уæдмæ. Мадта си спортсментæй ка архайидæ, уонæн дæр уидæ уæлдай зæрдтагон рæстæг – кæд æма си алкедæр уодуæлдайæй архайидæ иннетæбæл фæууæлахез унбæл, уæддæр сæ еци тох адтæй рæстзæрдæй, кæрæдземæн аккаг аргъ кæнгæй æма кæрæдзей нимайгæй. Еу загъдæй, Олимпиаг гъæзтитæ уиуонцæ спортивон арæхстдзийнадæ æма аллихузон адæмихæттити минæвæртти балимæндзийнади зæрдтагон бæрæгбон.

Уотæ, ку зæгъæн, бæргæ адтæй. Фал фæстаг рæстæгути сæ аразун ке бари иссæй, етæ син сæ еци рохсдзийнади медес исигъанзтонцæ аллихузон политикон гириззагдзийнæдтæй. Æндæра, е куд æй æма Олимпиаг æзмæлди архайæг паддзахæдтæн сæ сæйрагдæртæй еуей, Уæрæсей спортсментæн ма дæттæ уонæми архайуни барæ, уæхæн барæ си уæддæр ке фæууа, етæ ба нæдæр нæ бæсти номæй нæ, нæдæр нæ бæсти турусай хæццæ рацæун сæ бон ма уæд, нæдæр ба Уæрæсей паддзахадон гимн ма райгъуса сæ уæлахези фæдбæл.

Уомæ гæсгæ ба нури Олимпиаг гъæзтитæ нæ бон нæй бæрæгбон исхонун. Кæд бæрæгбон æй, уæддæр кедæр бæрæгбон, мах ба æгириддæр некæцирдигæй тавуй… Гъе уой фæдбæл ма финсдзинан нæ газети, абони ба бал  мухур кæнæн, Олимпиаг гъæзтитæ куд райдæдтонцæ, уой туххæй æрмæг.