Цæгат Иристони рæзикустгæнæн хæдзарæдтæ сæ тиллæг æрæмбурд кодтонцæ, æма республики гъæууон хæдзаради министрадæ куд фегъосун кодта, уотемæй анзи бæрæггæнæнтæмæ гæсгæ нæ аграрон кустуæттæ еумæйагæй æрæмбурд кодтонцæ 45 мин тонней бæрцæ рæзæ. Фари нимæдзти хæццæ рабаргæй, е æй минкъийдæр – уæд тиллæги еумæйаг бæрцæ адтæй 50 мин тонни.

Рæзи тиллæги хузти ’хсæн агъазиудæр хай – 95 проценти – ахæссуй фæткъу. Ами растауйнаг æй æнæнхæст бæрнондзийнади кустуат «Казачий хутор». Æ рæзæдæнттæ æнцæ станицæ  Æрхонкæй  ба Фарнигъæумæ хæстæг фæзуати. Фæллойнæгæнгутæ фарастсæдæ гектаремæй æрæмбурд кодтонцæ 34 000 тонни фæткъу. Хæдзаради зæнхити фулдæр хаййи ирæзунцæ товарон сорттитæ «Голден», «Гренни Смит», «Гала», «Ред Делишес» æма берæ æндæр хузтæ.

Аци гъæугæ гъуддаги дуккаг бунат ба ахæссуй Црауи гъæуи æнæнхæст бæрнондзийнади кустуат «Владка». Ци 122 гектари сæмæ ес, уонæй витаминон продукци исистонцæ 3 мин тонни – фæткъуй сорттитæ «Гала», «Фуджи», «Голден», «Ред Делишес», «Гренни Смит». Хæдзаради специалисттæ куд зæгъунцæ, уотемæй сæ размæ ци нисантæ æвардтонцæ, етæ сæ къохи нæ бафтудæнцæ, майи мæйи бонигъæдæ уазалтæ ке рахаста, уæдта сæрди мæйтæ ба æгæр тæвдæ ке адтæнцæ, уой фудæй. Црайуæгти кæрдтути тиллæг дæр еци æрдзон уавæрти фудæй аци анз рауадæй ниллæг.

Республики рæзикустгæнæн иннæ хæдзарæдти фæллойнадон бæрæггæнæнтæ ’нцæ уæхæн: «Де-Густо» (2 128,5 тонни), «Аланий рæзæдæнттæ» (1 223 тонни), «Аланий хуæнхон рæзæдонæ» (415 тонни), гъæууонхæдзарадон кустадон кооператив «Задхумæ» (177 тонни).

Продукций фулдæр хай лæвæрд цæуй республики базарадон кустуæттæмæ, уæдта ма ’й æрветунцæ Уæрæсей алли регионтæмæ дæр.

Нæ рæзæ æндæр рауæнтæмæ ке æрветæн, уой фæдбæл ба уой зæгъуйнаг ан, æ           ма е æхцæуæн хабар æй. Кæд æма нæ рæзæдæнтти тиллæгæрзад, куд имæ æнгъæлмæ кастæнцæ нæ рæзикустгæнгутæ, уомæй еуцæйбæрцæдæр минкъийдæр рауадæй, уæддæр нæхе фагæ дæр æй æма ма си кæмæндæр дæр ма хай кæнæн. Раздæр æнзти ба нæмæ рæзæ ке нæ фагæ кодта, уомæ гæсгæ сæ ластан æндæр, фулдæр хæттити идард рауæнтæй. Уой дæр – уоййасæбæл бæзгæ дæр нæ уиуонцæ, уотемæй.