22 июня 2024

РАЗÆНГАРДГÆНÆГ ÆМА НИФСДÆТТÆГ НИСАНТÆ

07.03.2024 | 21:50

Зундгонд куд æй, уотемæй Уæрæсей Федераций Президент Владимир Путин 29 феврали радзубанди кодта Федералон Æмбурдмæ æ Нистауæни  хæццæ. Е иссæй закъонаразгутæмæ Президенти нæудæсæймаг Нистауæн. Айдагъдæр 2017 æма 2022 æнзти еци мадзал арæзт не ’рцудæй – уæди уавæртæмæ гæсгæ. Нури Нистауæн банимайæн ес Уæрæсей Президент æвзурстити агъоммæ Владимир Путини программæбæл.

Æ радзубанди рахаста дууæ сахаттемæй минкъий фулдæр. Æма си ци фарстати фæдбæл дзурдта, етæ еугурæйдæр æнцæ баст нæ паддзахади райрæзти стратегион нисанти хæццæ. Æма уой фæдбæл Нистауæни ци гъудитæ æма фæндитæ загъд æрцудæй, етæ еугурæйдæр разæнгардгæнæг æнцæ, нæ цардарæзти исонибон зæрдæмæдзæугæдæр ке уодзæнæй, уомæн нифсдæттæг. Сæйрагдæр ба е æй, æма еци нисантæн сæ еугурейдæр æнтæстгинæй исæнхæст кæнунæн нæмæ ес фагæ гъæугæ равгитæ æма гæнæнтæ, æцæг нæ гъæуй еумæйагæй æма еузæрдиуонæй уонæй хæдзардзинæй испайда кæнун.

Владимир Путин æ Нистауæни ци аллихузон фарстати туххæй радзурдта, уонæй цалдæрей фæдбæл æрмæг мухур кæнæн нæ газети абони номери. Фæстæдæр ма нæмæ мухургонд цæудзæнæнцæ аллихузон æрмæгутæ.