Иннæ анзи фиццаг æмбесæн газеттæ æма журналтæ рафинсуни афонæ фиццаг сентябрæй фæстæмæ ке райдæдта, «Уæрæсей пост» уой туххæй игъосун кæнуй.

Æма аци бæнтти республики пости хайæдтæмæ бацæугæй, адæймагæн рафинсунæн ци равзара, уæхæн фадуат – сæ рафинсунмæ имæ «æнгъæлмæ кæсунцæ» 6000 газет æма журнали. Уонæй æ зæрдæмæ хъæбæрдæр ка цæуй, уони рафинсун æ бон æй пости еугур хайæдти, сайт «Уæрæсей пост»-и мобилон уæлæфтуани, уæдта терминалти агъазæй газеттæ æма журналтæ рафинсунæн фадуæттæ ка аразуй, еци постхæсгутæмæ.

Уомæй уæлдай, пости хайадæмæ бацæуæг адæймагæн ес равгæ скъолатæ-интернатти ахурдзаутæн, седзæрдæнтти цæрæг сувæллæнттæн, ветерантæн, каргун синхæгтæ, зæрæндти хæдзæртти цæрæг инвалидтæ, кенæ æндæр агъазгъæуагæ адæймагæн газеттæ æма журналтæ хуæрзауодæн уагæй рафинсунæн.

Ауæхæн арфиаг гъуддаг исаразун ке бафæндæуа, уой бон æй, пости хайади, кенæ акци «Дерево добра»-й сайти бæлвурд социалон косæндони адрес равзарун.

*  *  *

Аци хабæрттæмæ гæсгæ нæ дзиллæй уой корæн, æма ма базийнадæ кæнетæ мухури фæрæзнитæ рафинсунмæ. Зонæн æй, нури рæстæгути дзиллæмæ уоййасæбæл цæстиварди нæбал æнцæ мухури фæрæзнитæ. Е бустæги раст нæй, уомæн æма айдагъдæр уонæй райсæн ес æцæг пайдахæссæг зонадæ. Уомæ гæсгæ ба нæ зæрдæ дарæн, адæм фулдæр æргом ке раздахдзæнæнцæ мухури фæрæзнитæмæ, уæлдайдæр ба нæ цитгийнаг дигорон æвзагбæл газет «Дигорæ» æма журнал «Ирæф» дзиллонæй рафинсунмæ. Уомæй уæхецæн дæр æма, кæмæн ма фæййагъаз кæнайтæ, уонæн дæр устур уодæхцæуæндзийнадæ исараздзинайтæ.