Национ проект «Минкъий æма астæуккаг хузи кустуæтти райрæзт»-мæ гæсгæ нæ республики 62 агропромышленнон кустуати  райстонцæ æхцай фæрæзнитæ 132 миллион сомей бæрцæ. Еци фæрæзнитæ харзгонд æрцæудзæнæнцæ фонсдарæн фермитæ аразуни, техникæ æма ефтонггæрзтæ æлхæнуни, тиллæгæфснайæн бунæттæ аразуни, цехтæ æма рæзи кустгæнæн гъуддæгутæбæл. Республики хæдзарæдти арæзт æрцæудзæнæй 80 нæуæг косæн бунати. Еци еугур мадзæлтти фæрци дзæвгарæ фæффулдæр уодзæнæй гъæууонхæдзарадон продукций рауагъд.

*  *  *

Еугуруæрæсеуон æзмæлд «Гъæдтæ багъæуай кæнун»-и архайгæй, Мæздæги райони цæргутæ нерæнгæ бал фæзуæтти ниссагътонцæ 500 æнгозæ бæласи. Аци арфиаг гъуддаги архайунцæ алли кари  æма аллихузон дæсниæдтæбæл хуæст адæймæгутæ, уони еу  ба кæнуй уæхæн ихæс – сæ районæн, уæдта еумæйагæй райсгæй æрдзæн ести хузи агъаз фæуун. «Гъæдæ багъæуай кæнун»-и æзмæлд Мæздæги райони арæзт æрцæуй аллихатт дæр. Уотæ бабæй аци анз дæр. Еци æзмæлд адæми ахур кæнуй æрдзæмæ, гъæдæмæ бæрнондæр цæстæй кæсунбæл. Фондз анзей дæргъи æзмæлди архайгути нимæдзæ дзæвгарæ фæффулдæр æй. Е махæн æхцæуæн хабар æй», – зæгъунцæ гъæди хæдзаради косгутæ.

– Аци ахсгиаг куст ахедгæ фæрæзнæ ’й кæстæрти экологон гъомбæладæн дæр.

Етæ ци фæрæзнитæ бакосдзæнæнцæ, уонæй ба æлхæд æрцæудзæнæй ахургæнæн киунугутæ – 260 миллион сомей аргъ, – зæгъуй республики ахуради министри хуæдæййевæг Мæхъити Людмилæ.

*  *  *

«Гъæууон рауæнти æмхуæст райрæзт», зæгъгæ, программи фæрци 2025-2027 æнзти Цæгат Иристони ’рцæудзæнæнцæ арæзт æма цалцæггонд аст ахсгиаг социалон объекти. Зæгъæн, станицæ Змейкаги фæззиндзæнæй культури Хæдзарæ, æма, 360 бунати кæми уодзæнæй, уæхæн скъолай азгъунститæ. Цæмæй ахурдзаутæн уа равгитæ скъоламæ æдасæй цæунæн, уой туххæй ба æлхæд æрцæудзæнæй дууæ сæрмагонд автобуси. Дигорай бундоронæй цалцæггонд æрцæудзæнæнцæ сувæллæнтти 2-аг рæвдауæндони æма 2-аг скъолай азгъунститæ. Чиколай реабилитацион Центри азгъунст фæннæуæгдæр уодзæнæй. Аци гъæуи ма арæзт æрцæудзæнæй физкультурон-дзæбæхгæнæн дууæ комплекси, аййевдæргонд фæууодзæнæй сæйраг гъæунги ка ’й, еци спортивон фæзуат.

*  *  *

Портал «rabota.ru»-и фарстамæ гæсгæ, Уæрæсей цæргути 76 процентей фæндуй сæ кустæй уæгъдæ рæстæг ахурадæбæл харз кæнун, цуппæрæнхай ба цæттæ ’нцæ еци рæстæгæн сахат радех кæнунæн алли бон дæр, 40 процентей ба фæндуй алли бон дæр 2-3 сахатти ахур кæнун. Уой хæццæ ба 48 процентей фæндуй онлайн системæй ахур кæнун, иннетæ ба уарзунцæ киунуги хæццæ архайун.