Уæрæсей рохсади министр Сергей Кравцови загъдмæ гæсгæ, ахури нæуæг анзæй фæстæмæ нæ бæсти скъолати рауагъдонтæй сæ æнтæстгиндæртæн бабæй лæвæрд цæудзæнæнцæ æвзестæ майдантæ. Аци хуæрзеуæг нимад цæуй сугъзæрийнæ майдани фæсте дуккаг къæпхæни хуæрзеуæгбæл. 2014 анзæй фæстæмæ Уæрæсей федералон æмвæзадæбæл æвзестæ майдан нæ дæттунцæ, фал регионтæмæ ес ахурдзаутæн хуæрзеугути хузтæ (уой хæццæ – регионалон нисанеуæги æвзестæ майдантæ), федар кæнуни æма сæ скъола кастфæууæг адæмæн дæттуни барæ. Æма аци майдан бабæй федералон хуæрзеуæг ке исуодзæнæй, уомæй ниййергутæ æма ахурдзаутæ райгонд уодзæнæнцæ.

* * *

Колледжтæ æма техникумти æнтæстгиндæр ахурдзаутæн нисангонд Уæрæсей хецауади стипенди Цæгат Иристони есдзæнæнцæ Дзæуæгигъæуи электроники колледжи æртæ ахурдзауи, Элхотти берæпрофилон колледж æма Цæгат Иристони базарадон-экономикон колледжи фæйнæ дууæ ахурдзауи, уæдта Дзæуæгигъæуи Адæмти хæлардзийнади политехникон техникум æма Дзæуæгигъæуи берæпрофилон техникуми фæйнæ еу ахурдазуи. Стипенди син феддзæнæнцæ æнæгъæнæ ахури анз 2023 анзи сентябрæй фæстæмæ. Косæги дæсниадæ цæттæ кæнуни программæбæл ка ахур кæнуй, етæ стипенди есдзæнæнцæ 2000 соми, астæуккаг къæпхæни дæсниадæ бацæттæ кæнуни программæбæл ка ахур кæнуй, етæ ба – 4000 соми.

* * *

Аци анз сæрдигон каникулти рæстæг нæ республики адæмæн кустдæттæг Комитет 1168 скъоладзауемæн куст исамал кæндзæнæй.

Равгæ си уодзæнæй республики скъолатæ æма администрацити косунæн, фæзуæттæ фæлгонцадæ æма азгъунститæ æфсæйнаг косгутæн агъаз кæнунæн. Республики бюджетæй уой туххæй дехгонд æрцудæй кодта 2,6 миллион соми. Æнагъонти мизди рæстæмбес бæрцæ уодзæнæй 4516 соми. Адæмæн кустдæттæг комитет скъоладзаутæн агъази хузи уæлæнхасæн феддзæнæй фæйнæ 2250 соми. Аци анзи райдайæнæй нуриуæнгæ кустити архайдтонцæ фондзсæдæ дууинсæй 14-18-анздзуд адæймаги. Куститæй фæстæмæ ма аци анз 36 мин цæгатиристойнаг сувæллони рандæ уодзæнæнцæ дзæбæхгæнæн косæндæнттæмæ. Фæсевæд сæ фæллад уадздзæнæнцæ Цæгат Иристони сæрдигон лагертæ æма Краснодари крайи санаторон-курортон косæндæнтти. 1800 сувæллонемæй фулдæр рандæ уодзæнæнцæ Сау денгизи билгæрæнтти лагертæмæ.