Зундгонд куд æй, уотемæй Уæрæсей Президент исæвардта, газ цæргути хæдзæртти размæ бауадзуни ихæс. Æма уой гъæугæ хузи исæнхæст кæнунбæл нæ республики цæуй бæлвурд куст. Цæрæнуатон-коммуналон хæдзарадæ, артаг æма энергетики министр Тамати Майрæн куд зæгъуй, уотемæй 2021-2022 æнзти гъæуама газ бахъæртун кодтайуонцæ 1906 хæдзаремæ. Æнхæстæй сæмæ бахъæрттæй æрдзон артаг. Бафинстонцæ 2320 бадзурди, зæнхи хæйтти размæ газ бахъæртун кодтонцæ 2013 хæдзарей уæнгæ, 1155 хæдзареми ба газ искуста. Республикон æма федералон бюджеттæй граждæнти хецæн къуæрттæн газ бауадзуни хæрзти нихмæ дæттунцæ фæрæзнитæ. Аци анз гъæуама 441 хæдзарей уæнгæ бауадзонцæ артаг.

* * *

Æрæги Дзæуæгигъæуи Мариинаг театри филиали фиццаг хатт сценæй æвдист æрцудæй Хетæгкати Къостай поэмæмæ гæсгæ национ балетон спектакль «Фатимæ». Балети музыкæ æ рæстæги ниффинста зундгонд композитор, Цæгат Иристони аййевæдти æскъуæлхт архайæг Плити Жаннæ. Æма спектакль дæр æвæрд æрцудæй уой номерæнæн. Куд нисангонд цæуй, уотемæй балет «Фатимæ» исæвæруйнаг æнцæ Мæску æма Санкт-Петербурги театралон сценити, æма ма Плити Жанни райгурæн сахар – Цхинвали дæр.

* * *

«Цæгат Иристони физкультурæ æма спорти райрæзт», зæгъгæ, паддзахадон программæмæ гæсгæ идарддæр æнхæстгонд цæунцæ стадион «Спартак»-и райарæзти куститæ. Куд нисангонд æй, уотемæй сæ еумæйаг аргъ æй 2,9 миллиард соми. Проектмæ гæсгæ, стадион еу хаттæн исиуазæг кæндзæнæй 15 мин адæймаги. Еци рауæн сæрмагонд иуазгутæн ба уодзæнæй æхгæд, лоджитæ ке хонунцæ, уæхæн бунæттæ, тæрхонгæнгутæ, комментатортæ æма журналисттæн ба хецæн кабинкитæ, конференц-залтæ. Медæгæй спортивон къуæрттæн арæзт цæудзæнæнцæ хе æртайæн æма уæледарæс æййевæн азгъунститæ, футбол, рæуæг атлетикæ  æма, е ’нæнездзийнадæ гъигæдард кæмæн æй, еци æртæ  скъолайемæн ба залтæ тренировкитæ кæнунæн.