Зундгонд куд æй, уотемæй нæ республики Сæргълæууæг Сергей Меняйло æрæги Парламентмæ барвиста, «Республикæ Цæгат Иристон-Аланий паддзахадон æвзæгти туххæй», зæгъгæ, закъони проект. Æма бафæдзахста, цæмæй имæ каст æрцæуа æхсæнадон уагæй дæр, адæм зæгъонцæ сæ гъудитæ, сæ зæгъуйнæгтæ. Еци гъуддаги архайуни ихæс мах, газет «Дигорæ»-йи редакци дæр райстан нæхемæ. Аци закъони проекти фæдбæл æрмæгути хæццæ ма мухур кæнуйнаг ан, нæ мадтæлон æвзаги уавæр æма ирисхъи фæдбæл æрмæгутæ.

Æма уин абони уæ зæрдæбæл æрлæуун кæндзинан филологон наукити доктор Сабайти Сулеймани (1930-2014) финст уац (2-аг æма 6-аг фæрстæбæл). Æ рæстæги мухургонд æрцудæй журнал «Ирæф»-и (1991 анзи, дуккаг номери), фæстæдæр ба газет «Дигорæ»-йи дæр. Уæдæй ардæмæ ци рæстæг рацудæй, уой дæргъци æййивддзийнæдтæ куд не ’рцудæй нæ мадтæлон æвзаги уавæрти, уæлдайдæр ба дигорон æвзагмæ цæстдарди. Фал уæддæр, Сулейман уæд ци тухстаг фарстати фæдбæл загъта æ гъудитæ, уонæй кæцидæртæ абони дæр ма æнцæ дзурдтаг. Уогæ уин уони ци дзорæн – бакæсетæ Сабайти Сулеймани уац æма ин æ уæди зæгъуйнæгтæ рабаретæ абони уавæртæ æма хабæртти хæццæ.

*  *  *

Фæндуй ма нæ абони уæ еума цæмæдесаг æрмæги хæццæ базонгæ кæнун. Нури æзнæт рæстæгути нæ Фидибæстæмæ фудзæрдæ ка даруй, етæ нæ нихмæ аразунцæ аллихузон мæнгард миутæ. Зæгъæн, кæцидæр нигулæн бæстити разамунди фудзунддзийнадæ рабæрæг æй уомæй дæр, æма хъоди кæнун байдæдтонцæ уæрæсейаг культурæбæл. Сæ миутæ бæлвурдæй нæ цæунцæ сæ зæрдæмæ  сауæнгæ сæ бæстити рæстмæгъудигæнæг дзиллæн дæр – æгириддæр сæ нæ фæндуй Уæрæсей адæмти культури алæмæтдзийнадæй фенæхай ун, е син алкæддæр цæмæдесаг адтæй. Уомæн æвдесæн, абони 7-аг фарсбæл ци æрмæг мухур кæнæн, е дæр.