Рæхги Красноярски райдайдзæнæй Иван Ярыгини номбæл дуйнеуон турнир уæгъдебарæ гъæбесæйхуæстæй. Аци аллианзон мадзалæн æ ахедундзийнадæ устур æй. Уæрæсей номæй си ци богæлттæ фæххуæцунцæ, уонæй ами исбæлвурд кæнунцæ, нæ бæсти номæй Европæ æма дуйнеуон чемпионатти ка хуæцдзæнæй, уони. Уомæ гæсгæ Иван Ярыгини номбæл турнири еристи фæййархайунцæ тæккæ хъаурæгиндæр богæлттæ Уæрæсей æма æндæр бæститæй дæр. Цæгат Иристони номæй еци турнири аци анз ка хуæцдзæнæй, етæ сæхе бундоронæй цæттæ кодтонцæ Хæдарцати Аслани номбæл гъæбесæйхуæсти академий. Иристойнæгтæй уæлдай ма си адтæнцæ Уæрæсе æма æндæр бæститæй æрбацæуæг богæлттæ дæр. Сæ хæццæ кустонцæ Иристони зундгонд тренертæ.